अभिषेक शर्माचो शेंकडो, भारतान झिम्बाब्वेक हारयलो

भांगरभूंय | प्रतिनिधी

हरारे : अभिषेक शर्माच्या धमाकेदार शेंकड्याच्या तशेंच ऋतुरात गायकवाड आनी रिंकू सिंगाच्या आकर्शक खेळाच्या नेटार भारतान झिंबाब्वेक दुसऱ्या टी-20 मॅचींत 100 धांवड्यांनी हारयले. ह्या तिगांयच्या खेळाच्या नेटार भारतान पयलीं बॅटींग करतना 2 बाद 234 धांवड्यांचो दोंगोर उबो केलो. उपरांत झिंबाब्वेचो डाव 134 धांवड्यांत आटापलो.
भारतान टॉस जिखून पयलीं बॅटींग करपाचो निर्णय घेतलो. मात कॅप्टन शुभमन गिल सुरवेकूच आवट जालो. त्या उपरांत अभिषेक शर्मान धमाकेदार खेळ करतना 47 बॉलांत 7 चवके आनी 8 सक्यांच्या आदारान 100 धांवड्यो काडल्यो. तो आवट जाल्या उपरांत ऋतुराज गायकवाड आनी रिंकू सिंगान धुमाकूळ घालीत झिंबाब्वेची बॉलींग फोडून काडली. ऋतुराजान 47 बॉलांत नाबाद 77 जाल्यार रिंकून 22 बॉलांत नाबाद 48 धांवड्यो काडल्यो. मुझरबानी आनी मसाकाद्जाक दरेकी 1 विकेट मेळ्ळी.
जाप दितना झिंबाब्वेचो डाव कोसळ्ळो. माधेवेरे (43), बेनेट (26), जोंग्वे (33) हें तिगूच भारतीय बॉलरां मुखार उबें रावंक शकले. भारतावतीन आवेश खान आनी मुकेश कुमारान 3, रवी बिश्नॉयान 2 आनी वॉशिंग्टन सुंदरान 1 विकेट काडली.