भांगरभूंय | प्रतिनिधी
मुंबय, खबरां संस्था: नामनेची टीव्ही अभिनेत्री हिना खान हिका सगळींच वळखतात. हिना सोशल मिडियाचेर पोस्ट शेअर करीत आसता. मात तिच्या एका पोस्टान तिच्या फॅन्सांक धक्को बसला. हिनान पोस्टा वरवीं तिका ‘ब्रेस्ट कॅन्सर’ जाला अशी म्हायती दिल्या.
तिणें ह्या पोस्टांत बरयलां, ‘सध्या आपल्याचेर उपचार सुरू आसात आनी ह्या दुयेंसाक तोंड दिवपाक आपूण तयार आसा.’
हिना खान हांणी सोशल मिडियाचेर घातिल्ल्या पोस्टांत बरयलां, ‘‘सगळ्यांक नमस्कार! कांय वावड्यां विशीं उलोवपाचें आसा. म्हजेर मोग करपी आनी काळजी घेवपी सगळ्या लोकांक कितें तरी म्हत्वाचें सांगपाचें आसा. म्हाका स्टेज-३ स्तनाचो कॅन्सर जाला. ह्या रोगाक तोंड दिवपाक हांव तयार आसां. म्हजेर उपचार सुरू आसात. हांव बळिश्ट आसां आनी ह्या दुयेंसाक तोंड दिवपाक तयार आसां. ह्या कठीण काळांत म्हज्या गुप्ततायेचो आदर करात.’’
छत्तीस वर्सां पिरायेची हिना खान ही एक नामनेची टीव्ही अभिनेत्री. बर्याच काळा सावन चलत आयिल्ल्या ‘ये रिश्ता क्या कहलाता है’ हे टीव्ही मालिकेंत हिना खान हांणी केल्ले अक्षराचे भुमिके वरवीं ती लोकांच्या घराघरांनी पाविल्ली. उपरांत ‘बिग बॉस’ आनी ‘खतरों के खिलाडी’ ह्या रियलिटी शोंत वांटो घेवन ती पर्जळिल्ली. हिनाक स्तनाचो कॅन्सर जाल्ल्याचें कळटकच सगळ्यांक धक्को बसला.
स्तनांच्या टिशूंत जेन्ना हेर पेशी वाडटात तेन्ना स्तनांचो कॅन्सर जाता. संवसारीक पांवड्यार बायलां मदीं स्तनाच्या कॅन्सराचें प्रमाण दिसानदीस वाडत आसा. पूण, बायलांक चड प्रमाणांत हें दुयेंस जरी जाता आसलें तरी दादल्यांकय स्तनाचो कॅन्स जावंक शकता हें लक्षांत घेवप म्हत्वाचें.
स्तनाचो कॅन्सर आशिल्ल्याचें कळटकच एका खिणांतूच मनशाचें आयुश्य बदलता. कॅन्सराची खंयची स्टेज हाचेर ताचे उपचार निंबून आसतात. स्टेज-३ स्तनांचो कॅन्सर पातळपाक सुरू जाल्लो आसता. म्हळ्यार हो कॅन्सर ट्युमरा पलतडीं पातळ्ळा. मात हेर अवयवां मेरेन पावूंक ना, असो ताचो अर्थ. स्टेज-३ स्तनाचो कॅन्सर आशिल्ल्यो बायलो ह्या दुयेंसाक तोंड दिवन बर्यो जातात आनी सुटसुटीत जीण जगपाक शकतात.
स्टेज-३ कॅन्सर म्हळ्यार कितें?
बंगळुरूच्या फोर्टिस हॉस्पिटलाच्या मेडिकल ऑन्कोलॉजी आनी हेमॅटो ऑन्कोलॉजीची संचालिका डॉ. नीती रायजादा सांगता, स्टेज-३ स्तनाच्या कॅन्सरांत ट्युमर हो पांच सेंमी परस व्हड आसता. सुमार एका ल्हानश्या लिंबाच्या आकारा इतलो आसता. जो १-३ लिम्फ नोड्सांत (Lymph nodes) दिसून येता. हे लिम्फ नोड्स मानेच्या आनी स्तनांच्या भागांत दिसतात.
अशे परिस्थितींत स्तन, कांती मदीं बदल जाणवतात. स्तन दुखतात वा स्तनांतल्यान धवें, हळदुवें, पांचवें वा तांबड्या रंगाचें स्राव भायर पडटा. तशेंच अशीं जायतीं लक्षणां स्तनाच्या कॅनसरांत दिसून येतात. बंगळुरूच्या एचसीजी कॅन्सर सेंटरचे ऑन्कोलॉजिस्ट सल्लागार डॉ. श्रीनिवास बी. जे. हांणी ही म्हायती दिली.
स्टेज-३ कर्करोगाच्यो 3, 3B आनी 3C ह्यो तीन स्टेजी आसतात. हो कॅन्सर खंयचे स्टेजीर आसा आनी हें ट्युमर लिम्फ नोडलांत कितल्या प्रमाणांत आस्पावलां आनी हेर घटकांचेर निंबून आसता.
स्तनाचा कॅन्सर कित्याक वळखूंक येना?
सुरवातेच्या टप्प्यांतलो ट्युमर खूब ल्हान आसता आनी ताका लागून तो लक्षांत येना आनी ताचीं लक्षणांय दिसून येना, अशें डॉ. रायजादा सांगतात. मात नेमान स्वता परीक्षण केल्ल्यान आनी मॅमोग्रामाक लागून आमी वळखपाक शकतात.
डॉ. श्रीनिवास सांगतात, ट्युमराचो आकार, लिम्फ नोडचो वांटो आनी उपचारांक दुयेंती कसो प्रतिसाद दितात हाचे वयल्या दुयेंती बरो जावपाक शकता काय ना हें थारावं येता. वेळार लक्षणां दिसना, नेमान तपासणी करप ना हाका लागून स्तनाचा कॅन्सर स्टेज-१ वा २ मेरेन जाल्ल्याचें कळना.
डॉक्टर रायजादा सांगता, पिराय, आनुवंशिकता, जीवनशैली हेर घटकांक लागून स्तनांच्या कर्करोगाचो धोको निर्माण जावपाक शकता. कांय बायलां मदीं आनुवांशिक जनुके (genes) दिसतात (BRC1, BRC2, PLB2 हेर); जाका लागून हाचो धोक वाडपाक शकता.
स्टेज-३ कॅन्सर आशिल्ल्या दुयेतींनी कितें उपचार घेवचे?
स्टेज-३ स्तनाच्या कॅन्सराचेर उपचाराचे जायते प्रकार आसात आनी व्यक्तीच्या दुयेंसाची विशिश्टताय लक्षांत घेवन ते प्रमाण उपचार करतात.स्टेज-३ हो एक प्रगत स्तनाचो कॅन्सर आसून ताचेर सामके वेगळे तरेन उपचार करतात अशें डॉ. रायजादा म्हणटा.
जायते फावट हाचेर खर उपचार करतात. हातूंत शस्त्रक्रिया, कर्करोगाच्यो पेशी नश्ट करपा खातीर रेडिएशन थेरपी आनी पुराय शरीराचो विचार केलो, जाल्यार केमोथेरपी सारक्या उपचारपद्धतीची गरज जाणवता, अशें डॉ. श्रीनिवास सांगतात.
डॉ. रायजादा पुढे सांगतात, जायते फावट अशा प्रकरणांत स्तन वाचोवपाचो आमी यत्न करतात. ताका लागून निओएडजुव्हंट केमोथेरपी (Neoadjuvant Chemotherapy) आसता. तशेंच ER, PR, Her2neu सारक्या ट्युमराचेर विवीध तरेन उपचार करतात. जायते फावट रेडिएशनचीय गरज जाणवता.
कॅन्सरा आड लढपा खातीर सुरवातेक तो कळप खूब म्हत्वाचें. ४० वर्सां वयर आशिल्ल्या बायलांक नेमान शारिरीक तपासणी आनी मॅमोग्राम करप म्हत्वाचें. तुमच्या स्तनांत मात्सो लेगीत बदल दिसलो जाल्यार लागींच्या दोतोराचो सल्लो घेवपाक फाटीं सरचें न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
