भांगरभूंय | प्रतिनिधी
मुंबय, खबरां संस्था: बॉलिवूड अभिनेत्री मलायका अरोराचेर दुख्खाचो दोंगर कोसळ्ळा. ताचो बापूय अनिल अरोरा हांणी उंच इमारती वेल्यान उडी मारून आपलो जीव सोंपयलो. पुलिसांक हे विशीं म्हायती मेळटाच ते घडणुके सुवातेर पावले. ही घडणूक आयज सकाळीं सुमार ९ वरांचेर घडली. अभिनेतो अरबाज खान सध्या अरोरा कुटुंबा वांगडा आशिल्ल्याची म्हायती मेळ्ळ्या. अनिल अरोरा हांची कूड वांद्रेंच्या डॉ. भाभा हॉस्पिटलांत दवरल्या.
मुंबय बांद्राच्या आल्मेडा पार्क इमारतीचे सवे माळयेवेल्यान उडी मारून ताणें आत्महत्या केल्या हें उजवाडाक आयलेंं. अनिल अरोरान आत्महत्या केल्या हें कळटकच सगळ्याक बोवाळ जालो. तशेंच पुलीस घडणुकेच्या थळार धांवले. पुलिसांक आत्महत्या करपाची कसलीच नोट मेळूंक ना. अनिल अरोराची कूड पोस्टमार्टमा खातीर धाडल्या. ह्या प्रकरणांत पुलिसांनी चवकशी सुरू केल्या. आत्महत्या फाटलें कारण उक्तें जावंक ना. फाटल्या वर्सा अनिल हांची भलायकी इबाडिल्ल्यान तांकां हॉस्पिटलांत दाखल केल्ले.
मलायका अरोराचो बापूय अनिल अरो़रा पंजाबी हिंदू घराण्यांतलो. तांचें घराणें भारतीय शिमेचेर आशिल्ल्या फाझिलका शारांत आसा. अनिल अरोरा भारतीय मर्चंट नेव्हींत काम करताले. अनिल अरोरा हांणी मल्याळी क्रिस्तांव कुटुंबांतल्या जॉयस पॉलीकार्प हिचे कडेन लग्न केलें. मलायका ११ वर्सांची आसतना अनिल अरोरा आनी जॉयस हांचो घटस्फोट जाल्लो अशे मलायका हांणी आपले एके मुलाखतींत सांगिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
