भांगरभूंय | प्रतिनिधी
मुंबय, खबरां संस्था: मराठी सिरियलांनी आपल्या अभिनयाची छाप सोडपी आनी -पवित्र रिश्ता- सारकिल्ल्या गाजिल्ल्या हिंदी टिव्ही माळेंतल्यान घराघरांनी पाविल्ली अभिनेत्री प्रिया मराठे हिका ३८ वर्सां पिरायेचेर मरण आयलें. फाटलें वर्सभर ती कॅन्सरा कडेन झुजताली. आयज मिरा रोड वाठारांतल्या घरांत सकाळीं चार वरांचेर तिका मरण आयलें. अभिनेतो शंतनु श्रीकांत मोघे हाचे कडेन तिचें २०१२ त लग्न जाल्लें.
प्रिया मराठे हिका कांय वर्सां पयलीं कॅन्सर आसा म्हणून कळिल्लें. मदींच ती ह्या दुयेंसांतल्यान बरीय जाल्ली. मात, हालींत तिच्या शरिरांत कॅन्सर परत पातळपाक लागलो. निमाणीं आयतारा सकाळीं तिणें निमाणो स्वास घेतलो.
प्रिया मराठे हिचो जल्म २३ एप्रिल १९८७ दिसा ठाणे, महाराष्ट्र हांगा जाल्लो. मराठी सांस्कृतीक फाटभूंय आशिल्ल्या घरांत तिचें भुरगेंपण घडलें. इकरावेक शिकतना प्रियाक महाविद्यालयीन नाट्य सर्तींत वांटो घेवपाची संद मेळ्ळी आनी थंयच्यानूच तिच्या अभिनयाच्या प्रवासाक सुरवात जाली. अभिनयांतलें वाडत वचपी आकर्शणूच तिणें आपलें करियर म्हणून स्विकारलें.
साथ निभाना साथिया, तू तिथे में, चार दिवस सासूचे, कसम से, उतरन, भाग रे मन, स्वराजरक्षक संभाजी, तुझे मी गीत गात आहे, महाराणा प्रताप ह्यो तिच्यो कांय टिव्ही माळो. सोशल मिडियाचेर तिचे ६ लाख ३९ हजार चाहते आसात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
