अभिनेतो ऋतुराज सिंह संवसाराक अंतरलो

भांगरभूंय | प्रतिनिधी

मुंबय, खबरां संस्था ः अभिनेतो ऋतुराज सिंह (59) काळजाच्या आताकान संवसाराक अंतरलो. मध्यान राती मुंबयच्या लोकखंडवाला कॉम्प्लेक्सांत आपल्याच घरा ताका काळजाचो आताक आयलो.
ऋतुराजान जायत्या टिव्ही माळांनी अभिनय केला. ते बरोच तेंप दुयेंत आशिल्ले. तांच्या अचकीत मरणाक लागून जायत्या जाणांनी दुख्ख उक्तायला.
१९९० च्या दशकांत झी टीव्हीचेर ‘तोल मोल के बोल’ हो रियलिटी गेम शो होस्ट करून नांव जोडपी ऋतुराज सिंहान जायत्या टीव्ही माळांनी, फिल्मांनी आनी ओटीटी शोंत काम केलां. 1993 वर्सा झी टीव्हीचेर प्रसारीत जाल्लो ताचो ‘बनेगी अपनी बात’ हो टीव्ही शोय खूब लोकप्रिय जालो. ‘हिटलर दीदी’, ‘ज्योती’, ‘शपथ’, ‘अदालत’, ‘आहट’, ‘दिया और बाती’, ‘वॉरियर हाय’, ‘लाडो 2’ ह्या माळांनी तांणी म्हत्वाच्यो भुमिका केल्यात.