भांगरभूंय | प्रतिनिधी
मुंबय, खबरां संस्था: ज्येश्ठ बॉलिवूड अभिनेते मनोज कुमार हे ८७ वर्सां पिरायेचेर अंतरले. तांणी मुंबयच्या कोकिलाबेन धीरूभाई अंबानी हॉस्पिटलांत निमाणो स्वास घेतलो. बर्याच काळा सावन मनोज कुमार दुयेंत आशिल्ले. भलायकी इबाडिल्ल्यान कांय दिसां पयलीं तांकां हॉस्पिटलांत दाखल केल्ले. तांकां मरण आयिल्ल्यान सिनेमाच्या मळार दुख्ख पातळ्ळां.
मनोज कुमार देशभक्तीपर चित्रपटां खातीर वळखतात. तांचे कारकीर्दींत तांणी केल्ल्या देशभक्तीपर चित्रपटांक लागून तांकां बॉलिवूडांत ‘भारत कुमार’ म्हणून वळख मेळ्ळी. मनोज कुमार हांकां १९९२ वर्सा पद्मश्री आनी २०१५ त दादासाहेब फाळके पुरस्कारान सन्मानीत केल्ले. मनोज कुमार हांणी काम केल्लो राजा खोसला हांचो १९६४ वर्साचो मिस्ट्री थ्रिलर आशिल्लो ‘वो कौन थी?’ सुपरहीट थारलो. ह्या चित्रपटांतलीं ‘लग जा गले’ आनी ‘नैना बरसे रिमझिम’ ह्यां पदांक प्रेक्षकांनी खूब पसंती दिली. हीं दोनूय गाजिल्लीं गीतां लता मंगेशकार हांणी गायिल्लीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
