भांगरभूंय | प्रतिनिधी
हालींच एकपात्र कलाकार रमेश भिडे हे गोंयांत आयिल्ले. ते मूळ कोंकणांतले, पूण रावतात मुंबय. ‘… आणि डाॅ. काशिनाथ घाणेकर’ हो तांचो एकपात्री प्रयोग फोंड्यां आशिल्लो. अडेज वरांचें हें नाटक एकाच जाग्यार कित्याक, हो प्रस्न सगल्यांच्या मनांत आयला आसतलो. ताचे फाटलें कारण म्हणल्यार तिकेटीचे दर सामान्य मनशाक आयज परवडनात.
भिडेबाब हे नामनेचे कलाकार प्रभाकर पणशीकर हांचे वांगडचे. डाॅ. काशिनाथ घाणेकर हे तांचे इश्ट. दोतोरान आपले कारकिर्दींत जायते वाटचिरे उबे केले. प्रेक्षकां लागी तांचे संबंद बरे आशिल्ले. जर प्रेक्षक नात, तर नटाचो कांयच उपेग ना, अशें ते मानताले. ताका लागून ते प्रेक्षकांक देवाच्या जाग्यार मानताले. भिडेबाबान पसून प्रेक्षकांची गरज वळखून कमी दरांत हो एकपात्री प्रयोग दवरिल्लो. तांणी तो मी नव्हेच, अश्रूंची झाली फुले, नटसम्राट सारक्या नाटकांनी काम केलां. तांणी आतां मेरेन 2700 नाट्य प्रयोग केल्यात.
डाॅ घाणेकर हांच्यो गजाली तरी भरपूर आयल्यो, तर हें सदर करियराचें. ताका लागून तुमकां हातूंत कितें करियर करपाक मेळटा, ताचेर रमेश भिडे कितें सांगतात, तें पळोवया. भिडेबाब नाटकाचे आवडीक लागून कोंकणांतल्यान मुंबय गेले. व्हड त्रास काडून ते नाटकाचे माचयेर पावले. ते सांगतात, ‘पणशीकार, रमेश भाटकर हांचे सारक्या कलाकारां वांगडा काम करूंक मेळप हें म्हजें भाग्य. हांव समाधानी आसा. आदले सारकीं नाटकां मेळनात ही खंत मनांत आशिल्ली, म्हणून हांवें …. ‘आणि डाॅ. काशिनाथ घाणेकर’ हें एकपात्री नाटक सुरु केलें. ताचे आतां मेरेन 30 प्रयोग जाल्यात. गोंयांत म्हजो हो पयलोच प्रयोग.’
भिडेबाबांचें जल्मगांव मुटाट- देवगड. 17 एप्रील 1952 हो तांचो जल्मदीस. ते म्हणटात, ‘जर कोणाक अभिनयाच्या मळार येवपाचें आसा जाल्यार सगल्यांत पयलीं पाठांतर करपाक येवंक जाय. बरी स्मरण शक्त आसप सामकें गरजेचें. दुसऱ्यांचीं नाटकां शक्य तितलीं पळोवपाक जाय. तांच्या अभिनयाचें निरीक्षण, अभ्यास करपाक जाय. बरो चेरो आसपाकूच जाय अशें ना. पूण चार- चवगांक मानवता असो चेरो आसचो. प्रसंगावधान आसप गरजेचें. म्हणल्यार स्टेजीर कोणूय चुकलो जाल्यार तो चुकला हें प्रेक्षकांक दिसपाक जायना, हेर नटांनी ताका सांबाळून घेवपाक जाय. चुकिल्ल्या नटानूय आबूज जायनासतना फुडे संवाद म्हणटाक जाय. नाटकाची जी भाशा आसा वा तातूंत भाशेची जी बोली आसा, ताचेर तुमको शेक जाय. तुमचो उच्चार ती भाशा उलोवपी लोकां सारकेच आसूंक जाय.
दिग्दर्शक हें तुमकां बरे समजावन सांगपाक शकता. म्हाका पयलो दिग्दर्शक मेळ्ळो तो रामचंद्र वर्दे. उपरांत वसंत शणै, अशोक समेळ, मंगेश कदम, प्रभाकर पणशीकार हांचे सारके व्हडले दिग्दर्शक मेळ्ळे. तांचे कडल्यान हांव शिकत गेलों. ते एका अर्थान तुमचे गुरूच आसतात. उच्चाराचें म्हत्व तांणी सांगलें. उपरांत नाटकांत हालचाली म्हत्वाच्यो आसतात. सध्या रमेश भिडेबाब सिनेमा, मालिकांनी काम करतात. तांणी पुस्तकूय बरयलां. डाॅ. काशिनाथ घाणेकर हांचेरुय तांणी पुस्तक बरयलां. दुसरे धर्मीक पुस्तक.
डाॅ. काशिनाथ घाणेकर हांचें नाटक जांणी पळयलां, तांकां खबर आसतलीच की दोतोराच्या प्रवेशाकूच ताळयो मेळटाल्यो. एक वादळ म्हणू येता अशे रंगमाचयेर वावुरताले. घाणेकर हांच्यो बऱ्योचश्यो गजाली तांकां खबर आसा. ते एकपात्री प्रयोग करतना प्रेक्षकांक घाणेकरांचो उणाव जाणवना, इतलो बरो अभिनय ते करतात. तुमकां जर अभिनय येता जाल्यार आयज भरपूर संद आसा. नाटक, सिनेमा, न्यूज रिडर, टीव्ही माळो असो विस्तारलेलो संवसार आसा. ताचेर भायर सोशल मिडियाय आसा. आयज लाखांनी लोकांक हलकी फुलकी करमणूक जाय. तुमकां नाटकांक रस ना जाल्यार तुमी एकपात्री प्रयोग करूं शकतात.
नाटक येवप म्हणल्यार धाडस, आत्मविस्वास येवप जो तुमकां परिस्थिती नियंत्रणांत हाडूंक उपेगी पडटा. पूण ह्या फाट्यांत यश मेळ्ळें जाल्यार रातयां मेळटा. यशाचे तेंगशेर पाविल्ले आसतना थोड्यांक कामां मेळप बंद जातात. खंयच्याय खिणाक कितेंय जावं येता. तेन्ना खंयचोय धपको पचोवपाची मनाची तयारी जाय. मात टिव्ही माळांक लागून नोकरी कशी अभिनय करून दर म्हयन्याक जोडूंक मेळटा. वेसनां पसून मात पयस रावपाक जाय. तुमी अभिनय करतात जाल्यार ल्हान- ल्हान भुमिका करपाक सुरवात करात. मार्गदर्शन मेळोवपाक, दुबाव पयस करपाक रमेश भिडे हांकां फोन करचो. तांचो नंबर आसा, 98964 64777. तेन्ना अभिनयाच्या मळाचेर नांव करपाक मुखार सरात.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
