भांगरभूंय | प्रतिनिधी
मडगांवः मराठी ही एक प्रगत भास हातूंत दुबाव ना. ताणें अभिजात भाशेचो दर्जो मेळयला ही बरी गजाल. पूण अभिजात भास म्हूण कांय निकश लादून गट तयार केल्यार उरिल्ल्या भाशांचेर दुजाभाव केल्ल्याची परिस्थिती निर्माण जावं येता, देखून ताचेर परतून विचार करपाची गरज आसा अशें मत दामोदर मावजो हांणी उक्तायलें.
मराठी भाशेक अभिजात भास म्हूण दर्जो मेळ्ळा हाचेर उलयतना ज्ञानपीठकर दामोदर मावजो हांणी सांगलें, आतां मेरेन ज्या भाशांक अभिजात भाशेचो दर्जो मेळ्ळा, तांचो विचार केल्यार मराठी भाशेक हो दर्जो खूब उसरां मेळ्ळा. अभिजात भास म्हूण मराठीक अभिजात भाशेचो दर्जो मेळपाक जाय आशिल्लो. तशेंच ओडिया, तेलुगू सारकिल्ल्या भाशांक अभिजात भासांचो दर्जो मेळ्ळो पूण मराठी भाशेक हो दर्जो आदीं कित्याक दिलो ना हें आमच्या समजुती भायर आसा अशें तांणी सांगलें.
विकसीत भाशांक अभिजात भाशेचो दर्जो दिवप म्हणल्यार उरिल्ल्या भाशां मदीं स्पृश्य आनी अस्पृश्यते सारको वा एक व्हड आनी दुसरी ल्हान भास असो भेदभाव निर्माण जावपाक हे कारण थारतले. आयज ना फाल्यां सगल्या भाशांक अभिजात भाशेचो दर्जो मेळटलो. अभिजात भाशेचो दर्जो मेळ्ळे उपरांत दुसऱ्या भाशेक उणें लेखिल्ले भशेन जावपाक शकता. हातूंत खंयचीच भास उण्या दर्जाची आसा अशें न्हय. बंगाली भाशेची उपभास म्हूण वाद आशिल्ल्या भाशेक पयलीं अभिजात भाशेचो दर्जो मेळ्ळा आनी बंगाली भाशेक ते उपरांत मेळ्ळा हे समजुपा सारके न्हय, अशें मावजो हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
