भांगरभूंय | प्रतिनिधी
पणजीः अखील भारतीय विद्यार्थी परिशद (अभाविप) पुराय देशभरांत वसतीगृह सर्वेक्षण अभियान चालीक लावन वसतीगृहांची सत्य परिस्थितीचेर उजवाड घालतले तशेंच पुराय देशभरांतल्यान शैक्षणीक संस्थांनी वंदे मातरम् गिताची 150 वें वर्स मनयतले. तशेंच तरणाट्यांक डिजिटल वेसनांतल्यान भायर काडपा खातीर ‘स्क्रीन टायम टू अॅक्टिव्हिटी टायम’ अभियान देशभर राबयतले अशें अभाविपचे राष्ट्रीय सरचिटणीस विरेंद्र सिंह सोलंकी हांणी सांगलें.
अभाविपची दोन दिसांची केंद्रीय कार्यसमितीची बसका 17 आनी 18 जानेवारीक जांबावलेच्या दामोदर संस्थानांत जाली. हे बसकेंत चर्चेक आयिल्ल्या मुद्यां विशीं सोलंकी हांणी पणजेंत घेतिल्ले पत्रकार परिशदेंत म्हायती दिली.
बसकेंत संघटनात्मक विशयांचेर विशेश भर दिवन खोलायेन मंथन जालें. वांगडी अभियान, इकाई रचना, वर्सुकी कार्यावळींचे नियोजन, संघटणेच्यो मुळाव्यो रचना तशेंच कार्यकर्त्यांची भुमिका हे विशीं पुराय देशांतल्यान आयिल्ल्या कार्यकर्त्यांचे अणभव आनी सुचनांचेर गंभीर चर्चा जाली अशें सोलंकी हांणी म्हणलें.
15 फेब्रुवारी ते 15 मार्च ह्या काळांत पुराय देशभर ‘वसतीगृह सर्वेक्षण अभियान’ राबयतले आनी ह्या अभियाना वरवीं वसतीगृहांची प्रत्यक्ष स्थिती उजवाडाक हाडून धोरणात्मक सुधारणांचे दिकेन खर यत्न जातले. तशेंच वंदे मातरम् गीताक 150 वर्सा पुराय जाल्ले निमतान 23 मार्च ते 15 ऑगस्ट मजगतीं देशभरांतल्या शैक्षणीक संस्थानी ‘परिसर–परिसर वंदे मातरम्’ कार्यक्रमांचे आयोजन जातलें. हातूंत तरणाट्या मदीं देशप्रेम, राष्ट्रीय एकात्मता आनी सांस्कृतीक चेतना जागृत करतले अशी म्हायती सोलंकी हांणी दिली.
तशेंच राष्ट्रीय युवा दिसा निमतान सुरू केल्ले ‘स्क्रीन टायम टू अॅक्टिव्हिटी टायम’ हें अभियान व्यापक पांवड्यार राबवोन तरणाट्यांक डिजिटल वेसनांतल्यान भायर काडून तांकां खेळ, समाजीक सहभाग, सर्जनशील व शारिरीक उपक्रमां कडेन जोडपाचें कार्य वर्सभर विवीध कार्यवळींच्या माध्यमांतल्यान जातलें अशें सोलंकी हांणी म्हणलें.
ह्याच वांगडा संघ शताब्दी वर्स, भगवान बिरसा मुंडा हांची 150वी जयंती, महाराणी अब्बक्का हांचे 500वें राज्यारोहण वर्स, गुरु तेग बहादुर हांचो 350वो बलीदान दीस, यशवंतराव केळकर जल्मशताब्दी वर्स अश्या साबार इतिहासीक आनी प्रेरणादायी घडणुकांचे निमतान पुराय देशभरांत विवीध शैक्षणीक, समाजीक आनी सांस्कृतीक कार्यवळींचें आयोजन जातलें अशी म्हायती सोलंकी हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
