भांगरभूंय | प्रतिनिधी
पत्रादेवी अबकारी चेक नाक्यार धरिल्लो दोन कोटींचो सोरो
पेडणें: पत्रादेवी अबकारी चेक पोस्टाचेर अबकारी उपनिरीक्षक देऊ राऊत हांच्या फुडारपणा खाला चोरयां सोरो येरादारी करपी प्रकरणांत एक वाहन धरलें. ह्या वाहनांतल्यान दोन कोटी ८८ लाख ९३ हजार रुपयांचो सोरो आनी सुमार २० लाख रुपयांचें वाहन जप्त केलें. हे फाटभूंयेर अबकारी उपनिरीक्षक देऊ राऊत हांची सरकारान बदली केली. हाका लागून अबकारी विभागांत बरोच बोवाळ निर्माण जाला. जर चोरयां सोरो येरादारी करतना ती अबकारी अधिकार्यांनी धरल्यार, तांकां अशे तरेन ख्यास्त मेळपाक शकता काय ही सादी बदली, असो दुबाव ते उक्तायतात.
फाटले फावटीं अशेंच वेंचणुकेच्या काळांत चोरयां सोर्याची येरादारी धरिल्ल्या अधिकार्याचो सरकारान सय्कार केल्लो. मात हे फावट ६ तारखेर दोन कोटी ८८ लाखांचो सोरो धरपी उपनिरीक्षक देऊ राऊत हांची बेगोबेग बदली करून, हो सरकारान कसलो न्याय केला? असो प्रस्न हजर जाता.
चड म्हायती प्रमाण, ६ मेक सांजेवेळार ५.१५ वरांचेर उपनिरीक्षक देवू राऊत हांणी हेर अबकारी अधिकार्यां सयत पत्रादेवी कार्यरत आसतना एक वाहन, नोंदणी क्रमांक एचआर-५८-डी-०७५२ हें बेकायदेशीर वाहन आनी दोन कोटी ८८ लाखांचो सोरो धरिल्लो.
ही कारवाय उपनिरीक्षक देऊ राऊत, भारत गांवकार, सखाराम पालयेंकार, सुभाष गांवस आनी पुंडलिक शिरोडकार हांणीेल्ली. मात अबकारी उपनिरीक्षक देऊ राऊत हांची बदली केल्ल्यान सध्या बरोच बोवाळ निर्माण जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
