भांगरभूंय | प्रतिनिधी
काबूल, खबरां संस्था ः अफगाणिस्तानाचें चलन ‘अफगाणी’ हें सप्टेंबराचे तिमाहीत संवसारांत सगल्यांत बरी कामगिरी करपी चलन थारलां. तीन महिन्यांत 9% आनी एका वर्सांत 14% वाड जाल्या. सद्यां डॉलराचे तुळेन अफगाणीचें मोल (भारतीय चलनांत) 78 रुपया 25 पयशे आसा. कोलंबियाचे चलन पेसो 3% वाडी सयत दुसऱ्या क्रमांकाचेर आसा. भारतीय रुपयाचें मोल 83 रुपया 12 पयशे आसा.
वर्सुकी तत्त्वाचेर ‘अफगाणी’ तिसऱ्या क्रमांकाचेर आसा. पेसो पयल्या क्रमांकाचेर आसा आनी ताचे उपरांत श्रीलंकेच्या रुपयाचो दुसरो क्रमांक आसा. चलन घटमूट करप हें अल्पकालीन. कारण अर्थीक, समाजीक आनी राजकी अस्थिरताय आसा अशें भुंय- राजनीतीक कामरान बुखारी हांणी सांगलें. तालिबानान 15 ऑगस्ट 2021 दिसा अफगाणिस्तान ताब्यांत घेतिल्लें.
अफगाण चलनाची मागणी वाडता
परकी चलनाच्या वेव्हाराचेर खर निर्बंध आनी वेपारांत खूब ल्हवू उदरगत जाल्ल्यान अफगाणीची मागणी वाडल्या, अशें लंडनांतल्या बीएमआयचे युरोप कंट्री रिस्कची मुखेली अन्विता बसू हांणी सांगलें. तांणी म्हणलें, ‘अफगाणिस्तान वर्साचे अखेरेक सध्याच्या पांवड्यार थीर जावपाची शक्यताय आसा.’
तालिबानान डॉलर काडपाची मर्यादा वाडयली
चलन घटमूट जाले उपरांत केंद्रीय बँकेन वेवसायांक डॉलर काडपाची मर्यादा म्हयन्याक 25 हजार डॉलरांतल्यान 40 हजार डॉलर मेरेन वाडयल्या. व्यक्तीं खातीर दर सप्तकाक 600 डॉलर मेरेन आतां काडपाक मेळटले, जें दोन वर्सां आदीं 200 डॉलर आशिल्लें. चलन घटमूट जाल्ल्यान म्हारगायेचें चेपण उणें जातलें. अंदूं अफगाणिस्तानाची अर्थवेवस्था देंवतली आनी 2025 मेरेन 2% ते 3% वाडटली असो अदमास संवसारीक बँकेन उक्तायला. पूण संवसारीक मजत उणी जातली, अशीय शिटकावणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
