भांगरभूंय | प्रतिनिधी
अफगाणिस्तान पंगडान बांगलादेशाक तीन वन डे मॅचींचे माळेंतले दुसरे मॅचींत 142 धांवड्यांनी हारोवन माळेंत 2-0 अशी निर्णायक आघाडी घेतली.
अफगाणिस्तानाच्या जैतांत रहमानुल्लाह गुरबाज आनी इब्राहीम जादरान पर्जळ्ळे. दोगांयनी शेंकड्यांची नोंद केली. ह्या दोगांय ओपनरांनी बांगलादेशाच्या बॉलरांची बॉलींग फोडून काडली.
टॉस हारल्या उपरांत पयलीं बॅटींग करतना अफगाणिस्तानान निर्धारीत 50 ओव्हरींनी 9 विकेटी वगडावन 331 धांवड्यो केल्यो. सगल्यांत चड धांवड्यो रहमानुल्लाह गुरबाजान केल्यो. ताणें 125 बॉलांनी 13 चवेक आनी आठ सक्यांचे मजतीन 145 धांवड्यो केल्यो. ताचे खेरीत इब्राहीम जादरानान 119 बॉलांनी 100 धांवड्यो केल्यो. हातूंत णव चवक्यांचो आनी एका सक्याचो आस्पाव आशिल्लो.
ह्या दोगांयनी पयले विकेटी खातीर विक्रमी 256 धांवड्यांची भागिदारी केली. हे भागिदारीक लागून अफगाणिस्तानाक 300चो आंकडो हुपप शक्य जालो. ताणें निमाण्या 14 ओव्हरींनी 9 विकेटी वगडावन फकत 75 धांवड्यो करप शक्य जाल्यो. बांगलादेशा वतीन शाकिब अल हसन, मेहदी हसन मिराज, मुस्तफिजुर रहमान आनी हसन महमूद हांणी दरेकी दोन विकेटी घेतल्यो. एक विकेट एबादोत हुसैनाक फावो जाली.
मोखीचो फाटलाव करपी बांगलादेशाक हें आव्हान पेलूंक ना आनी ताचो डाव 43.2 ओव्हरींनी फकत 189चेर सोंपलो. ताचे वतीन मुश्फिकुर रहीमान सगल्यांत चड धांवड्यो केल्यो. ताणें 85 बॉलांनी 6 चवक्यांचे मजतीन 69 धांवड्यांची खेळी केली. ताचे खेरीत शाकिब अल हसन आनी मेहदी हरन मिराज हांणी दरेकी 25 धांवड्यो केल्यो.
अफगाणिस्ताना वतीन फजल हक फारुकी आनी मुजीब उर रहमान हांणी दरेकी तीन विकेटी घेतल्यो. जाल्यार राशिद खानान दोन आनी मोहम्मद नबीन एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
