अफगाणिस्तानाची जैताची हॅट्रीक

भांगरभूंय | प्रतिनिधी

अफगाणिस्तानान संवसारीक वन डे क्रिकेट सर्तींतलें आपलें उत्कृश्ट प्रदर्शन चालूच दवरतना काल नॅदरलॅण्ड पंगडाक हारयलो. अफगाणिस्तानाच्या ह्या जैतान पाकिस्तानाचें  सेमी फायनलींत पावपाचें सपन भंगुये. अफगाणिस्तान सातांतल्यो चार मॅची जिखून आठ गुणां सयत पांचवे सुवातेर पावलो. जाल्यार पाकिस्तान सवे सुवातेर घसरलो.

मजगतीं, नॅदरलॅण्डाक पयले ओव्हरींत धपको बसल्या उपरांत मॅक्स ओडोव (42) आनी कॉलिन एकरमन (29) हाणें 70 धांवड्यांची भागिदारी केली. पूण, नॅदरलॅण्डाच्या बॅट्समनांनी धांवबाद जावपाचो क्रम चालू केलो. खेळपट्टीचेर जम बसोवपी बॅट्समन बाद जाल्या उपरांत मुखेली स्कॉट एडवर्ड (0) धांवबाद जालो. बॅस डे लीड (3) हो लेगीत बाद जालो. सायब्रॅण्ड एंगेलब्रेचान 86 बॉलांनी 58 धांवड्यांची खेळी करून नॅदरलॅण्डाक सांबाळिल्लो. पूण, तोय लेगीत धांवबाद जालो. नॅदरलॅण्डाचो डाव 46.3 179 धांवड्यांचेर सोंपलो. मोहम्मद नबीन तीन आनी नूर अहमदान दोन विकेटी घेतल्यो. संवसारीक वन डे क्रिकेट सर्तींत एका डावांत चार वा ताचे परस चड बॅट्समन धांवबाद जावपाची ही 12वी खेप आसा. अफगाणिस्तानान अंदूंचे सर्तींत सात मॅचींनी सगल्यांत चड 198 ओव्हरी स्पिनरां कडल्यान करून घेतल्यात. ताच्या उपरांत न्युझिलॅण्डाचो (147.4) क्रमांक लागता.

अफगाणिस्ताना खातीर रहमनुल्लाह गुरबाज आनी इब्राहीम झाद्रान हाणें आक्रमक सुरवात करून नेट रन रेट सुदरावपाचो यत्न केलो. मॅची पयलीं अफगाणिस्तानाची -0.718 अशी नेट रन रेट आशिल्ली आनी ती पॉझिटिव्ह करपा खातीर तांकां 10.1 ओव्हरींनी 180 धांवड्यो करपाची गरज आशिल्ली. पूण, तांकां तशें करप शक्य जालें ना.

6वे ओव्हरींत लोगन व्हॅन बिकान अफगाणिस्तानाच्या गुरबाजाक (10) तंबूंत धाडलो. झाद्रान (20) रोएलॉफ व्हॅन डेर मर्वच्या बॉलाचेर बाद जालो. अशे तरेन अफगाणिस्तानान 10.1 ओव्हरींनी दोनूय बॅट्समन वगडायले. पूण, रहमत शाह आनी हशमतुल्लाह शाहिदी हांणी तिसरे विकेटी खातीर 74 धांवड्यांची भागिदारी केली. रहमत शाहान 52 धांवड्यांचेर साकिब जुल्फिकाराच्या बॉलाचेर बाद जालो. पूण, अझमतुल्लाह ओमारझई (नाबाद 31) आनी शाहिदी (नाबाद 56) हांणी अफगाणिस्तानाक 7 विकेटींनी जैत मेळोवन दिलें. अफगाणिस्तानान 31.3 ओव्हरींनी 3 विकेटी वगडावन 181 धांवड्यो केल्यो.