भांगरभूंय | प्रतिनिधी
बॉलरांच्या आनी धनंजय डिसिल्वाच्या अर्द शेंकड्या नेटार श्रीलंकेन संवसारीक टी-20 क्रिकेट सर्तीच्या सुपर 12तले मॅचींत अफगाणिस्तानाक 9 बॉल बाकी राखून 6 विकेटींनी हारयलो. ह्या जैता सयत श्रीलंकेन सेमी फायनलींत सुवात मेळोवपाची आपली आस्त कायम राखली, जाल्यार अफगाणिस्तानाचें निमाण्या चारांत सुवात मेळोवपाचें सपन भंगलें.
अफगाणिस्तानान टॉस जिखून पयलीं बॅटींग करपाचो निर्णय घेतलो. ताणें डावाक सुरवात लेगीत बरी केली. पूण, उपरांत थारावीक अंतरान विकेटी वगडायल्यो. अखेरेक ताका 8 विकेटी वगडावन 144 धांवड्यो करप शक्य जाल्यो. ओपनर बॅट्समन रहमानुल्ला गुरबाजान 28 आनी उस्मान गनीन 27 धांवड्यो केल्यो.
श्रीलंके वतीन हरसंगान चार ओव्हरींनी 13 धांवड्यो दितना तीन विकेटी घेतल्यो. जाल्यार फास्ट बॉलर लाहिरू कुमारान चार ओव्हरींनी 30 धांवड्यो दिवन 2 विकेटी मेळयल्यो.
ते उपरां धनंजयान 42 बॉलांनी नाबाद 66 धांवड्यांची आकर्शक खेळी केली. ताका लागून श्रीलंकेन 18.3 ओव्हरींनी 4 विकेटी वगडावन 148 धांवड्यो करून सोंपें जैत जोडलें.
अपेक्षाकृत ल्हान मोखीचो फाटलाव करतना श्रीलंकेन बरी सुरवात जाली ना. मुजीब उर रहमानान पथुम निसांकाक (10) रोखडोच बाद केलो. फजलहक फारुकीन फुडली ओव्हर मेडन घालून श्रीलंके वयली पकड घट्ट केली. कुशाल मॅंडिसान (25) फुडले ओव्हरींत सेगीत दोन चवके मारले, ताका लागून श्रीलंकेन पावरप्लेंत एक विकेट वगडावन 28 धांवड्यो केल्यो. राशिद खानान आपले पयले ओव्हरींत मॅंडिसाक बाद केलो. पूण, राशिदाचे फुडले ओव्हरींत 14 धांवड्यो दिल्यो. हे ओव्हरींत धनंजयान एक चवको आनी सको लेगीत मारलो.
धनंजयान चरीथ असलांका (19) वांगडा मेळून 54 धांवड्यांची आनी भानुका राजपक्षे (18) हाच्या वांगडा मेळून 42 धांवड्यांची भागिदारी करून श्रीलंकेक जैत मेळोवन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
