भांगरभूंय | प्रतिनिधी
फाटल्या वर्सभरांत मनोहर आंतरराष्ट्रीय विमानतळान (एमआयए) (जीएमआर गोवा आंतरराष्ट्रीय विमानतळ लिमिटेड कडल्यान विकसीत आनी संचालीत) उल्लेखनीय कामगिरी आनी अमूल्य धडे घेतल्यात. प्रवाशांची वाडिल्ली संख्या, विस्तारीत मार्ग आनी आंतरराष्ट्रीय सेवा सुरू करपाचें ध्येय पुराय करून एमआयए आतां 25 देशी आनी 4 आंतरराष्ट्रीय मार्गांक जोडलां. इंडिगो, आकाशा एअर, विस्तारा आनी स्पायसजेट सारकिल्ल्यो सगळ्यो घरगुती विमान कंपनी मोपा सेवा दितात. आंतरराष्ट्रीय मार्गांचेर एअर इंडिया, ओमान एअर, इंडिगो आनी तुई कंपनीं सेवा दितात. 5 जानेवारी 2023 दिसा उक्तावण जाले उपरांत 30 लाखां वयर प्रवासी हाताळपी एमआयएन गोंयच्या हवाई येरादारीच्या मळार बदल
घडोवन हाडपाक म्हत्वाचें योगदान दिलां.
इतिहासीक परंपरा मोडून एमआयएन वर्सभर सातत्यान हवाई येरादारी तिगोवन दवरली, गिमाळ्याच्या हंगामांत दिसपी पारंपरीक उणाव पसून भरून काडलो. गोंयाक जोडिल्ल्या देशी मार्गांची संख्या दुपेटी परस चड वाडून आतां ती 29 जाल्या, जी एमआयए सुरू जावचे पयलीं 14 आशिल्ली. वर्साक 80 लाख प्रवाशांचेर पावपाचो हेतू आशिल्लो फेज 3 स्टेज 1 विस्तार 2024 वर्साच्या शिंयाळ्या वेळापत्रका पयलीं पुराय जावपाचो आसा.
एमआयएच्या उत्कृश्टतायेक मान्यताय दिवन भारतीय विमानतळ प्राधिकरणान नोव्हेंबर 2023 वर्सा भारतांतल्या पयल्या 15 विमानतळां मदीं एमआयएचो क्रमांक दिला, हें कर्तृत्व विमान क्षेत्रांत ताच्या नेटान वाडपाची गवाय आसा.
मुळावी बांदावळ
एमआयएची मुळावी बांदावळ अद्भुत आसा, तातूंत कोड ई/ एफ अनुरूप धांवपट्टी, विस्तारीत टॅक्सी वे आनी अत्याधुनीक प्रवासी टर्मिनल इमारत आसा. विमानतळाचो बरो संबंद नियोजीत मल्टी-मोडल मुळाव्या साधनसुविधांचो आसा, तातूंत 6 लेन एक्सप्रेसवे आनी रेल्वेमार्गाचो आसपाव आसा.
प्रवाशांचो अणभव
एमआयए प्रवाशांचे खातीर एक आगळोच आनी जितो जिवो गोंयचो अणभव दिता, इंद्रियां तृप्त करता. क्युरेट केल्ल्या
सुगंधाचेर गोंयच्या विशयाचेर आदारिल्ली आर्ट गॅलरी, खाशेले खाणां- जेवणाचें दुकान, आनी लायव्ह संगीत मेरेन एमआयए याद उरपी प्रवास अणभवाची खात्री दिता. 2023 वर्सा सीआयआय कडल्यान उत्कृश्ट प्रवासी अणभव डिझायन पुरस्कार मेळिल्ल्या एमआयए विमानतळाच्या दर्ज्याच्या सर्वेक्षणांत उत्कृश्ट 4.9 समाधान रेटिंग मेळयलां.
पुरस्कार आनी मान्यताय
एमआयएन जायते पुरस्कार मेळयल्यात. तातूंत “बेस्ट सस्टेनेबल ग्रीनफील्ड एअरपोर्ट”, “बांदकाम सुरक्षीतताय” आनी “बेस्ट एनवायरनमेंटल प्रॅक्टीस” हांचो आस्पाव आसा. प्रवासी टर्मिनला खातीर आयजीबीसी प्लॅटिनम रेटिंग मेळोवन, एमआयएक संवसारीक पांवड्यार ताच्या टिकावूपणाक मान्यताय मेळ्ळ्या. लंडनांत जाल्ल्या आंतरराष्ट्रीय विमानतळ शिखर सभेंत आनी सीआयआय इंडिया डिझायन शिखर सभेंतूय पुरस्कार मेळ्ळ्यात. प्रवासी टर्मिनला खातीर आयजीबीसी प्लॅटिनम रेटिंग मेळोवन,
म्हाल येरादारी
जानेवारी 2023 वर्सा म्हाल सेवा सुरू केल्या उपरांत एमआयए गोंयांत अर्थीक वाड करपा खातीर म्हत्वाचें केंद्र जालां. वखदां ते भाजीपालो मेरेन विंगड विंगड म्हाल हाताळपी एमआयएच्या तापमान नियंत्रीत म्हाल टर्मिनलान पयल्या 11 म्हयन्यांत सुमार 750 मेट्रीक टन माल हाताळ्ळा.
एमआयए फकत विमानतळ न्हय; वाड, नवनिर्माण आनी संवसारीक दर्ज्याचो प्रवास अणभव दिवपाची वचनबद्धतायेचें हें प्रतीक.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
