अपुरबायेचो पावसाळो

भांगरभूंय | प्रतिनिधी

पावस आमकां शिकयता की जिणेंतल्या बऱ्या- वायट अणभवांक पुरायपणान भिडप, गुंतप. हाचो अर्थ साद्या सुखांत खोस मेळोवप, आमच्या चुकां वयल्यान शिकप वा संकश्टांत बळगें मेळोवप.

पावसाळो हो वर्साचो एक खाशेलो काळ. उमाशेच्या उश्ण म्हयन्यां उपरांत ताजेपण दिवपी बदल म्हणून तो येता. पावस धर्तरेचेर आशिल्ल्या हर एक मनश्याचें मन थंड करुन वता. जनावरां, सुकणीं, झाडां हांकां सगळ्यांक विसव आणि एक नवें जीवन दिवपाचें काम पावस आपल्या
खांदार घेता. पावस आनी धुकें आशिल्लें हवामान खूब शांत. तातूंत शांत करपी सौंदर्यशास्त्र आसा. म्हणूनच पावसाचे दीस म्हजे खूब आवडीचे.
एक वेगळीच ताजेपणाची भावना येता, जेन्ना हांव ल्हान भुरग्यांक कागदी बोटी तयार करून त्यो उदकांत सोडपाक पालव दितां, तांकां कागदाचीं व्हडीं उदकांत सोडटना पळयतां, शाळेंतल्यान घरा येतना भुरगीं जेन्ना कसलोच हुस्को करिनासतना चिखलाच्या उदकांत उडकी मारून उदक शिंपडटात तेन्ना म्हाका म्हज्या भुरगेपणाची याद जाता.
ताज्या पाचव्या आळवा पानांचेर मोतयां सारके खीणभर नाचपी ते उदकाचे थेंबे, पावसाचो आवाज, पयलेच खेप भिजिल्ले ते मातयेचो मनाक मोनेळ घालपी सुवास… पावस सैमाक पाचव्याचार रंगान नटयता. पावस पडटना जनेला भायर पळयत, मधुर आनी मन शांत करपी त्या संगीतान गरम चायेचो घोट घेवपाची प्रक्रिया म्हजी सामकी लाडाची.
देशांतल्या शेतां, भाटां, पोरसांतल्या पिकां खातीर हो पावस खरेंच मोलाचो. शेतकार बरे पिकावळी खातीर पावसाची वाट पळयतात. ते पावसाचे उदक बांय आनी टांकयेंत एकठांय करून ताचो उपेग शिंपणावळी खातीर वापरतात. कारण पावस उणो जालो तर दुकळ पडूं येता आनी पिकां लेगीत सुकपाची भिरांत आसता. पावसाचें उदक हें धर्तरेचेर जियेवपा खातीर सैमीक उदकाचो स्रोत जावन आसा आनी आमी तें बरे भशेन सांबाळपाक खातीर हातभार लावपाची आज खरेंच गरज आसा.
पावस आमकां शिकयता की जिणेंतल्या बऱ्या- वायट अणभवांक पुरायपणान भिडप, गुंतप. हाचो अर्थ साद्या सुखांत खोस मेळोवप, आमच्या चुकां वयल्यान शिकप वा संकश्टांत बळगें मेळोवप. पावसाची जाणविकाय करप म्हणल्यार दरेक खीण जाणीवपूर्वक जियेवप.

अक्षदा सावंत देसाय
[email protected]