भांगरभूंय | प्रतिनिधी
-सर्वोच्च न्यायालयाच्या निर्देशांचे जातले पालन : सभापतीपणजी : अपात्रताय याचिके संंबंधी सर्वोच्च न्यायालयान दिल्या निर्देशांक पाळो दितना याचिकेचेर 3 आनी 4 ऑक्टोबराक निमणी सुनावणी जातली. दोन दीस ही सुनावणी चलतली, अशी म्हायती सभापती रमेश तवडकार हांणी दिली.
याचिकादार डॉमनीक नोरोन्हा हांचे अपात्रताय याचिकेचेर शुक्रारा सुनावणी जाली. प्रतिवादी आठ आमदारां मदीं सात आमदारांनी प्रतिज्ञापत्र सादर केलां. सर्वोच्च न्यायालयाच्या निर्देशा प्रमाण सुनावणी बेगीन पुराय जावपाक जाय. 3 आनी 4 ऑक्टोबराक निमणी सुनावणी जातली. 4 ऑक्टोबराकूच निकाल जाहीर जातलो, अशें सांगपाक जावचे ना, अशें सभापतींनी सांगलें.
काँग्रेसीच्या आठ आमदारांनी दोन वर्सां पयली वेगळो गट स्थापन करून भाजपांत प्रवेश केल्लो. ह्या आठ आमदारांचो भाजप प्रवेश बेकायदा थारता असो दावो करीत डॉमनीक नोरोन्हा हांणी अपात्रताय याचिका दाखल केल्या. हे याचिकेचेर बिरेस्तारा सुनावणी जाली. हे भायर गिरीश चोडणकार आनी अमीत पाटकार हांणी स्वतंत्रपणान अपात्रताय याचिका दाखल केल्या.
बिरेस्तारा सुनावणी वेळार सभापतींनी सर्वोच्च न्यायालयाचो निर्देश वाचून दाखयलो. सप्टेंबर 2022 मदीं मायकल लोबो, दिगंबर कामत, डिलायला लोबो, केदार नायक, संकल्प आमोणकार, दिगंबर कामत, अालेक्स सिक्वेरा आनी रूडॉल्फ फर्नांडीस हांणी वेगळो गट स्थापन करून भाजपांत प्रवेश केल्लो. ह्या आठ आमदारां आड अपात्रताय याचिका दाखल जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
