भांगरभूंय | प्रतिनिधी
-गिरीश चोडणकाराच्या याचिकेचेर सर्वोच्च न्यायालयांत सुनावणी
पणजी : आमदार अपात्रताय याचिके विशीं सभापती आड सर्वोच्च न्यायालयांत दाखल केल्ल्या याचिकेचेर सोमारा सुनावणी जावन प्रतिवादी आमदारांक प्रतिज्ञापत्र सादर करपाक दोन सप्तकांची मुजत दिल्या. हाचे उपरांत याचिकादार लेखी बाजू सादर करतले. सर्वोच्च न्यायालयांत फुडली सुनावणी येत्या जानेवारीत जातली.
काँग्रेसीच्या आठ आमदारांनी पोरूं वेगळो गट स्थापन करून भाजपांत प्रवेश केलो. आठ आमदारांचो भाजप प्रवेश बेकायदाे थारता, असो दावो करीत काँग्रेसीचे आदले प्रदेश अध्यक्ष गिरीश चोडणकार हांणी सभापती मुखार अपात्रताय याचिका दाखल केल्या. ही याचिका अजून सुनावणेक येवपाची आसा. भाजपांत प्रवेश केल्ल्या आठ आमदारां विशीं सभापती मुखार आनीक अपात्रताय याचिका आसा. प्रदेश अध्यक्ष अमित पाटकार हांचे याचिकेचेर सभापती मुखार सुनावणी सुरू आसा. अपात्रताय याचिकेचेर बेगिनांत बेगीन सुनावणी घेवन ती निकालांत काडपाचे आदेश सभापतींक दिवचे, अशी मागणी करपी याचिका गिरीश चोडणकार हांणी सर्वोच्च न्यायालयांत दाखल केल्या. ही याचिका सर्वोच्च न्यायालयांतत सोमारा सुनावणेक आयली.
न्यायमूर्ती संजीव खन्ना आनी न्यायमूर्ती एस व्ही एन भट्टी हांचे पिठा मुखार सुनावणी जाली.
याचिकेतल्या प्रतिवादींक हालीच नोटीसो जारी जाल्यात. प्रतिज्ञापत्र सादर करपाक दोन सप्तकांची मुजत दिवची, अशी लेखी मागणी प्रतिवादी आमदारांच्या आदोगादान केली. पिठान ही मागणी मान्य केली. प्रतिवाद्यांनी प्रतिज्ञापत्र सादर केले उपरांत याचिकादार गिरीश चोडणकार हांकां लेखी बाजू मांडपाक दोन सप्तकांची मुजत दिल्या. हाका लागून फुडली सुनावणी जानेवारींत जातली.
प्रतिज्ञापत्र सादर करपाक प्रतिवादी आमदारांक दोन सप्तकांची मुजत दिवची, अशे लेखी पत्र तांच्या आदोगादान पयलीच सर्वोच्च न्यायालयाक दिल्लें.
दिगंबर कामत, मायकल लोबो, अालेक्स सिक्वेरा, राजेश फळदेसाय, डिलायला लोबो, रूडाल्फ फर्नांडीस, केदार नायक आनी संकल्प आमोणकार ह्या आठ आमदारांनी पोरूं चवथी उपरांत वेगळो गट स्थापन करून भाजपांत प्रवेश केल्लो. गिरीश चोडणकार हांचे अपात्रताय याचिकेचेर सभापतींनी अजून नोटिसो लेगीत जारी करूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
