भांगरभूंय | प्रतिनिधी
मुरगांवः पश्चीम मुंबयच्यान एके नेण्टे चलयेक पळोवन गोंयांत हाडिल्ल्या रोड रोमियोक वास्को पुलिसांनी सांपळो रचून ताब्यांत घेतलो. ते नेण्टे चलयेक मेरशेंच्या ‘अपना घरां’त धाडल्या.
मुंबय मालवणी पुलीस स्टेशनाचेर 3 जानेवारीक एके नेण्टे चलयेचें अपहरण केल्ल्याची कागाळ दाखल केल्ली. उपरांत पुलिसांनी ते चलयेचो सोद घेवपाक सुरवात केली. निमाणी ती चली आनी तिचें अपहरण करपी गोंयांत, वास्को शारांत आशिल्ल्याचें मोबायला वरवीं समजलें. पुलिसांनी रोखडीच हे विशीं वास्को पुलिसांक म्हायती दिली. तशेंच ते चलयेचीं घरचींय गोंयांत आयलीं.
वास्को पुलीस निरिक्षक कपील नायक हांच्या फुडारपणा खाला उपनिरिक्षक रोहन नागेशकार, सहाय्यक पुलीस उपनिरिक्षक सुरेश वेळीप, हवालदार संदीप नायक, हवालदार दामोदर मयेंकार, शिपाय रवींद्र रुद्रगुल हांणी सांपळो रचून बुधवारा सांजेवेळार मुरगांव पालिके मुखार ते चलयेक आनी अपहरण करपी गुलाब सलीम खान (29, रा. अदंबरी नवाडा राजोली – बिहार) हाका ताब्यांत घेवन ते चलयेची सुटका केली. दुबावीत गुलाब खानाक अटक करून कोठडेंत दवरला. वास्को पुलीस ह्या प्रकरणांत फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
