भांगरभूंय | प्रतिनिधी
म्हापशें पुलिसांची बिजापूरांत कारवाय; दुबाविताक अटक
भांगरभूंय । प्रतिनिधी
म्हापशें: लक्ष्मीनगर म्हापशेंच्यान फुसलावन पळोवन व्हेल्ले 14 वर्सां पिरायेचे चलयेची म्हापशें पुलिसांनी इटगी बिजापूरच्यान सुटका केली. ह्या प्रकरणांत दुबावीत नागेश उर्फ संजू लालसाब कोलकार (23, रा. लक्ष्मीनगर, मूळ बिजापूर) हाका अटक केली.
हो अपहरणाचो प्रकार 10 जूनाक जाल्लो. पिडेस्ताचे आवयन त्याच दिसा दनपारां पुलिशेंत वचून कागाळ दाखल केल्ली. ते प्रमाण पुलिसांनी दुबाविता आड गुन्यांव दाखल केल्लो.
पिडेस्त चलयेक घेवन दुबावीत आपलो मूळ गांव व्यंकटेशनगर, वासवन, बिजापूर- कर्नाटकाक गेल्ल्याची म्हायती पुलिशेक मेळिल्ली. ते प्रमाण म्हापशें पुलीस पंगड कर्नाटकाक गेलो. पूण दुबावीत आपल्या घरा नाशिल्लो. ते उपरांत पुलिशेक चवकशेंत दुबावितान पिडेस्त चलयेक इटगी बिजापूर वाठारांत दवरिल्ल्याची म्हायती मेळ्ळी. बुधवारा 14 जूनाक पुलिसांनी थंय वचून दुबाविताक ताब्यांत घेतलो आनी पिडेस्त चलयेची सुटका केली.
दुबाविताक आनी पिडेस्त चलयेक म्हापशें पुलीस स्टेशनाचेर हाडले उपरांत दुबावीत नागेश कोलकाराक रितसर अटक केली. म्हापशें न्यायालयान दुबाविताक चार दीस पुलीस कोठडेंत दवरपाचो आदेश दिला.
मजगतीं, पिडेस्त चलयेची गोमॅकाँत वैजकी तपासणी केली. ते तपासणेचो अहवाल आयले उपरांत गुन्यांवा खातीर गरजेचीं कलमां जोडटले, अशी म्हायती मेळ्ळ्या. पुलीस निरिक्षक सीताकांत नायक हांच्या मार्गदर्शना खाला उपनिरिक्षक बाबलो परब, रिचा भोंसले, यशवंत मांद्रेंकार, विराज कोरगांवकार, हवालदार सुशांत चोपडेंकार, कॉन्स्टेबल प्रकाश पोळेकार, आनंद राठोड, प्राजक्ता झालबा ह्या पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
