अपहरण केल्ले रेल्वेंतल्या १०४ ओलिसांची सुटका : ३० जवान शहीद

भांगरभूंय | प्रतिनिधी

इस्लामाबाद, खबरां संस्था : भारताच्या शेजारचें राष्ट्र पाकिस्तानांतल्या अशांत अशा बलुचिस्तान प्रांतांत फुटीरतावाद्यांनी सुमार ५०० प्रवाशांक घेवन पेशावराक वचपी जाफर एक्स्प्रेसचेर हल्लो केलो आनी तांणी हे रेल्वेचें अपहरण केलें. रेल्वेंतल्या प्रवाशांची सुटका करपा खातीर पाकिस्तानी लश्कराक संपर्क केलो. उपरांत लश्कर आनी फुटीरतावाद्यां मदीं फारपेट जाली. पाकिस्तानी सरकारान हे घडणुके विशीं, उपरांत पाकिस्तानी लश्करांनी केल्ले कारवाये विशीं चडशी म्हायती उक्ती करूंक ना. तरी, बलुचिस्तान लिबरेशन आर्मीन (बीएलए) जाफर एक्सप्रेसींतल्या सुरक्षा दळां सयत २१४ परस चड प्रवाशांक ओलीस दवरिल्ल्याचो दावो केला. तशेंच, ह्या वेळार फुटीरतावादी आनी पाकिस्तानी लश्करा वांगडा जाल्ल्या संघर्शांत लश्कराचे ३० जवान शहीद जाल्ल्याचो दावो बीएलएन केला.
पाकिस्तानी सुरक्षा दळ फाटीं सरना जाल्यार ओलिसांक मारून उडोवपाची धमकी बीएलएन दिल्या. मजगतीं, पाकिस्तानी लशकरान दावो केलो, आमी फुटीरतावाद्यांचे तावडेंतल्यान १०४ नागरिकांची सुटका केल्या. हो हल्लो बीएलएच्या माजिद ब्रिगेडने केला, जी बलुचिस्तानाक पाकिस्तान सावन स्वातंत्र्य मेळोवन दिवपा खातीर यत्न करतात. स्वतंत्र बलुचिस्तानाची मागणी करपी बीएलएन पाकिस्तान आनी चीना आड नव्या खर आक्रमणाची हालींच घोशणा केल्ली. उपरांत आतां हो हल्लो जालो.

बलुच लिबरेशन आर्मीच्यो मागण्यो कितें?
बलुचिस्तानांत पाकिस्तानाच्या खंयचेच सुरक्षा एजन्सीचो प्रभाव नासचो, ह्या प्रांतांत सुरक्षा एजन्सीचो प्रतिनिधी नासचो, ही बीएलएची मुखेल मागणी. हाचे सयत चीन सरकारान बलूच प्रांतांत सुरू केल्ल्या सीपीईसी प्रकल्पाचेर बलुचिस्तानी लोक बेजार आसात. ह्या प्रकल्पा वरवीं बलुच प्रांतांत खनिजे लुटली जात आशिल्ल्याचो हांगच्या लोकांचो दावो आसा. तशेंच ह्या प्रकल्पाक लागून बलुच प्रांतांतल्या हजारांनी लोकांक विस्थापीत जावचें पडलें. कांय वेळा सरकारान थळाव्यांच्यो मागण्यो आडनदर करून तांचें विस्थापन केलां. हाका लागून बलुच लोक फाटल्या कितल्याशाच वर्सां सावन ह्या प्रकल्पा आड आंदोलन करतात. ह्याच काळांत कांय फुटीरतावाद्यांनी शस्त्रां हातांत घेतलीं. दुसरे वटेन, सरकारान बलुचिस्तानी लोकांच्या आंदोलनाची दखल घेवंक ना. हाका लागून संघर्ष वाडला.