भांगरभूंय | प्रतिनिधी
मनीष आरोलकारः रस्तो बंद करपाक कोणाची परवानगी?
भांगरभूंय । प्रतिनिधी
मुरगांवः वास्को शारांतलो एफ एल गोम्स रस्तो राष्ट्रीय म्हामार्ग म्हूण सुचीत नासतना ह्या रस्त्या वयल्यान राष्ट्रीय म्हामार्गाच्या उड्डाण पुलाक जोडपी अपर रॅम्प म्हणल्यार एफ एल गोम्स रस्त्याचो खून करपा सारकें आसा, अशें मुरगांवचे आदले नगराध्यक्ष मनीष आरोलकार हांणी म्हणलां.
एफ एल गोम्स रस्त्या वयल्यान अपर रॅम्प कोणाक जाय, हे संबंदान वास्को तशेंच मुरगांवच्यो लोकांक म्हायती दिवप गरजेची आसा. शारांतल्या एफ एल गोम्स रस्त्या वयल्यान अपर रॅम्प करपा खातीर राष्ट्रीय म्हामार्ग प्राधिकरणाक कसलो अधिकार आसा? ह्या प्रकरणांत दक्षीण गोंय जिल्होधिकारी, मुरगांव उपजिल्होधिकारी हांणी लक्ष दिवप गरजेचें आसा. एमपीए, गॅमन इंडिया, राष्ट्रीय म्हामार्ग प्राधिकरण आनी हेर संबंदितां कडेन एफ एल गोम्स रस्तो येरादारी खातीर बंद करपाची परवानगी आसा काय ना हाची चवकशी जिल्होधिकाऱ्यांनी करप गरजेचें आसा, अशें आरोलकार हांणी म्हणलां. एमपीए, गॅमन इंडिया कंत्राटदारान पूर्वसुचोवणी दिनासतना एफ एल गोम्स रस्तो बंद करचे खातीर गोंय सरकाराच्या खंयच्या विभागा कडल्यान परवानगी घेतल्या ताची म्हायती दिवप गरजेचें आसा, अशेंय तांणी म्हणलां.
एफ एल गोम्स रस्त्याची रुंदी 17 मिटर आसा. जर अपर रॅम्प उबारलो जाल्यार रस्त्याची रुंदी फक्त 7 ते 8 मिटर बाकी उरतली. ताका लागून फुडारांत ह्या रस्त्या वयल्यान येरादारी करतना वाहन चालकांक खूब त्रास सोंसचो पडटलो. ह्या रस्त्या वयल्यान अपर रॅम्प उबारप तंत्रीक नदरेन शक्य ना. कारण हो रस्तो राष्ट्रीय म्हामार्ग नाशिल्ल्यान ह्या रस्त्याचेर सर्वीस रस्तो करप म्हणल्यार संबंदीत विभाग पिशेंपणां करता, अशी टिका आरोलकार हांणी केल्या. एफ एल गोम्स रस्तो बंद केल्ल्यान ताचो त्रास मुरगांव, देस्तेरो बायणा, जेटी, बोगदा, सडा वाठारांतल्या लोकांक व्हड प्रमाणांत जाता, अशें आरोलकार हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
