भांगरभूंय | प्रतिनिधी
पास जातकच तें दोतोर जावपाचें. इश्टिणीचे स्कुटरीचेर फाटल्यान बसून वतना फुडल्यान आयिल्ले स्कुटरीचो धपको बसून ताका मरण आयलें. स्कुटर चलोवपी चली जखमी जाल्या. चुकीचे दिकेन येवन धपको मारपी चलोय गेलो. ताचे फाटल्यान बशिल्ल्याची भलायकी हुस्क्याची आसा. बेतोड्यां जाल्लो हो भिरांकूळ अपघात. अपघातांत सांपडिल्लीं सगलीं 21- 22 वर्सां पिराय गटांतलीं. देशाची ‘अपघाताची राजधानी’ आशिल्ल्या गोंयांत पोरूं 2,682 अपघातांत 286 जाणांक मरण आयलां. भितर 35 वर्सां सकयले 130 जाण आसात. पोरूं एका डिसेंबरांतूच 243 अपघातांत 24 जाणांक मरण आयलें. 2023 त 290 जाण सोंपिल्ले. 113 दादले आनी 17 बायलो. दरवर्सा 250 ते 325 जाणांक मरण येता. फाटलीं चाळीस वर्सां हो मरणकटो चालूच आसा. अपघातांत दिव्यांग जाल्ल्यांचो आंकडो व्हडलो आसतलो. चडशे अपघात हे मनशाचे चुकी खातीर जाल्यात, तर कांय जाणांक तांची कसलीच चूक नासतना मरण आयलां. अपघात उणे करपाचेर सरकारान उपाय घेवपाक जाय, पूण सगल्यांत बरो उपाय खुद्द गाडी चलोवपीच काडपाक शकतात!
अपघाताक आतां नवें एक कारण मेळ्ळां. सोशल मिडिया. आयज जायते जाण (पिराय 14 ते 50+) दुचाकी, मोटार चलयतना मॅसेजी वाचतात, व्हिडियो पळयतात. दोळे उक्ते दवरून भोंवपी सगल्यांक हें खबर आसा. घडये येरादारी खातें नकळो आसतलें! सोशल मिडिया पळयतना अर्थांत गाडयेचो वेग उणो आसता. पूण दावे वटेनच्यान धांवपी गाडी नदर अस्थीर आशिल्ल्यान उजवे वटेन आयल्यार अपघात!! अचकीत गाडी स्लो जाता, मागीर फुडल्याच खिणाक वेगान धांवता, ताचे फाटलें हेंच कारण. गाडी चलयतना उलोवपाक जायना असो कायदो आसा. मात भोवतेक सगलेच कुशीक बशिल्ल्याक पळयत नेटान गजाली मारीत गाडी चलयतात. हे ड्रायव्हर स्वता फोंडांत पडटाच, पूण निश्पाप लोकांकूय त्रासांत घालतात. पुलिसांनी हाचेर कितें उपाय काडला? काय तांबडें सिग्नल लागतकच पाव मिटर पसून गाडी मुखार थांबयल्यार पांचशे रुपया तालांव घालपी एआयचेर ते अवलंबून आसात?
गोंयांत पोरूं साडेतेरा लाख गाडयो धांवताल्यो. म्हणल्यार दर गोंयकारा फाटल्यान 0.8 गाडयो. आतां मेरेन हो आंकडो चवदा लाखांक तेंकला आसतलो. येता ते चवथीक उण्याच 500 गोंयकारांक सॉर्तीच्यो मुफत गाडयो मेळटल्यो! रस्तो रुंद केल्यार अपघात जायनात, अशें म्हणटात, मात चडशे अपघात सरळ रस्त्यांचेरूच जाल्यात. रस्त्यांची बाबत स्थिती हेंय अपघाताचें कारण. पार्किंगाक लागून अपघात वाडल्यात. बरेच कडेन रस्त्या कुशीक गाडयो पार्क करतात. मागीर खंयच्यान कोण येता तें कळना. पणजे तर सोबितीकरणाच्या नांवा खाला फुटपाथ रुंद केल्ल्यान रस्ते अशीर जाल्यात. देखून पळयत थंय येरादारीची कोंयडी. दोनूय वटेन पार्किंग केल्लें आसतना तांचे मदीं एका फाटल्यान एक गाडयो पार्क केल्ल्यो दिसतात. पणजेक 3- 4 मंत्री मेळ्ळे, कितलेशेच पुलीस अधिकारी आयले आनी गेले, पूण कोणाकूच हें जाग्यार घालप शक्य जावंक ना.
हॅल्मॅट ना, बेल्ट लावप ना, ड्रग्स, सोरो पियेवप, वेगान गाडी चलोवप, रस्त्यां वयलीं फोंडकुलां, वाडिल्लो ताण- तणाव, मानसीक दुयेंसां हींय अपघाताचीं आनीक कांय कारणां. हाचेरूय उपाय जाय. गोंयांत भौशीक येरादारी भरंवशाची ना. कोरोना उपरांतच्या काळांत तर ती सामकीच बाबत जाल्या. ताका लागून शक्य आसा आनी परवडटा ते सगले स्वताची गाडी वापरतात. ज्या वाठारांत भौशीक गाडयां परस खाजगी गाडयो चड, थंय अपघात हे वाडटलेच.
तरणाटे म्हणल्यार राष्ट्राचो फुडार. पूण अपघातांनी आमी अशे तरणाटे वगडावंक लागले जाल्यार तें देशा खातीर व्हड लुकसाण थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
