अपघात जावपी वाठार सोदचे

भांगरभूंय | प्रतिनिधी

मायकल लोबोः फोंडकुलां खातीर कंत्राटदारांचेर कारवाय करची

भांगरभूंय । प्रतिनिधी

पणजीः पुलिसांनी येरादारी आनी भौशीक बांदकाम खात्याच्या अधिकार्‍यां सयत रस्त्यांची पळोवणी करून अपघात जावपाची शक्यताय आशिल्ल्या वाठारांचो सोद घेवचो, अशी मागणी आमदार मायकल लोबो हांणी पुलीस म्हासंचालक अलोक कुमार हांचे कडेन केली. फोंडकुलां खातीर फकत पावसाक दोश दिवन चलचें ना. कंत्राटदारांचेर कारवाय करपाची मागणी तांणी केली. अपघातांच्या वाडट्या प्रमाणा विशीं हुस्को उक्तायतना तांणी ही मागणी केली.

गोंयांत अपघातांचें प्रमाण वाडत आसा. वर्साक 300 परस चड लोकांक अपघाताक लागून मरण येता. अपघातांचेर नियंत्रण दवरपाक उपाय येवजण करपाचे मागणे खातीर आमदार मायकल लोबो हांणी बिरेस्तारा पुलीस महासंचालकांची भेट घेतली. ह्या वेळार आमदार डिलायला लोबो आनी आमदार केदार नायक हाजीर आशिल्ले.

दिसान दीस अपघातांचो आंकडो वाडत आसा. अपघातांतल्या जखमींक लागून गोंय वैजकी म्हाविद्यालय हॉस्पिटलांतल्यो खाटी सेगीत भरिल्ल्यो आसतात. अपघात नियंत्रणांत हाडपा खातीर सरकारान उपाय येवजण्यो करपाक जाय. पुलीस म्हासंचालकां कडेन आमी हाचेर चर्चा केल्या. कांय म्हयन्यां पयलीं येरादारी खात्याच्या अधिकार्‍यान सुचवणी तकटो लावपा विशीं पंचायत तशेंच नगरपालिकांक पत्र बरयल्लें. सुचोवणी तकटो बसोवपाची कार्यवाय कोणीच करूंक ना. वाहनचालकांक सादूर करपा खातीर गरजेच्या सुवातांचेर सुचोवणी तकटे बसोवपाची गरज आसा. तशेंच कांय वाठारांत परवानो नासतना 18 वर्सां पिराये सकयले तरणाटे गाडयो चलयतात. हो प्रकार बंद जावपाक जाय, अशें मायकल लोबो हांणी सांगलें.

रस्त्याचेर पडपी फोंडकुलांक कंत्राटदार जापसालदार आसा. फकत पावसाक दोश दिवन प्रस्न सुटावो जावचो ना. दोशी कंत्राटदारांक काले वळेरेंत घालपा सयत तांचेर कारवाय करपाक जाय. मुख्यमंत्री डॉ. प्रमोद सावंत हांचे कडेन ह्या विशयाचेर आपूण चर्चा करतलों, अशें तांणी सांगलें.

पालकांचेर कारवाय करपाक जाय : डिलायला

गाडी चलोवपाचो परवानो नासतना नेण्टे पिरायेचे चले दुचाकी चलयतात. भुरग्यांच्या आवय बापायन आपल्या भुरग्यांक समज दिवपाक जाय. परवानो नासतना गाडयो चलोवपी तरणाट्यांच्या पालकांचेर कारवाय करपाक जाय, अशी मागणी आमदार डिलायला लोबो हांणी केल्या.