भांगरभूंय | प्रतिनिधी
फोंडकुलांं खातीर कंत्राटदारांचेर कारवायेची मागणी
पणजी, प्रतिनिधी : पुलिसांनी येरादारी आनी भौशीक बांदकाम खात्याच्या अधिकार्यां सयत रस्त्यांची पळोवणी करून अपघात प्रवण वाठारांचो सोद घेवचो, अशी मागणी आमदार मायकल लोबो हांंणी पुलीस म्हासंचालक अलोक कुमार हांचे कडेन केली. फोंडकुलां खातीर फकत पावसाक दोश दिवन चलचें ना. कंत्राटदारांचेर कारवाय करपाची मागणी तांणी केली. अपघातांच्या वाडट्या प्रमाणा विशी हुस्को उक्तायतना तांणी पुलीस महासंचालक अलोक कुमार हांचे कडेन अशी मागणी केली.
राज्यांत अपघातांचें प्रमाण वाडत आसा. वर्साक ३०० परस चड लोक अपघाताक लागून मरतात. अपघातांक आळाबंद घालपाक उपाय येवजण करपाचे मागणे खातीर आमदार मायकल लोबो हांणी बिरेस्तारा पुलीस महासंचालकांची भेट घेतली. ह्या वेळार आमदार दिलायला लोबो आनी आमदार केदार नायक हाजीर आशिल्ले.
दिसांन दीस अपघातांचो आंकडो वाडत आसा. अपघातांतल्या जखमींक लागून गोंय वैजकी म्हाविद्यालय हॉस्पिटलांतल्यो खाटी सेगीत फुल्ल आसता. अपघातांक आळाबंद घालपा खातीर सरकारान उपाय येवजण्यो करपाक जाय. पुलीस म्हासंचालकां कडेन आमी हाचेर चर्चा केल्या. काय म्हयन्यां पयलीं येरादारी खात्याच्या अधिकार्यान सुचवणी तखटो लावपा विशीं पंचायत तशेंच नगरपालिकांक पत्र बरयल्लें. सुचोवणी तखटो बसोवपाची कार्यवाय कोणीच करूंक ना. वाहनचालकांक सादूर करपा खातीर आवश्यक त्या जाग्याचेर सुचोवणी फलक बसोवपाची गरज आसा. तशेंच कांय वाठारांत परवानो नासतना १८ वर्सां पिराये सकयले तरणाटे गाडयो चलयतात. हो प्रकार बंद जावपाक जाय.
रस्त्याचेर पडपी फोंडकुलांक कंत्राटदार जापसालदार आसा. फकत पावसाक दोश दिवन प्रस्न सुटावो जावचो ना. दोशी कंत्राटदारांक ब्लॅक लीस्ट करपा सयत तांचेर कारवाय करपाक जाय. मुख्यमंत्री डॉ. प्रमोद सावंत हांचे कडेन ह्या विशयाचेर हांव चर्चा करतलों, अशें तांणी सांगलें.
पालकांचेर कारवाय करपाक जाय : दिलायला
गाडी चलोवपाचो परवानो नासतना सान पिरायेचे चले दुचाकी चलयतात. भुरग्यांच्या आवय बापायन आपल्या भुरग्यांंक समज दिवपाक जाय. परवानो नासतना गाडयो चलोवपी तरणाट्यांच्या पालकांचेर कारवाय करपाक जाय, अशी मागणी आमदार दिलायला लोबो हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
