भांगरभूंय | प्रतिनिधी
मडगांवः कुंकळ्ळी मतदारसंघांतल्या उस्किणीबांद ते बाळ्ळी मेरेनच्या सोबितीकरण प्रकल्पाचें काम आमदार युरी आलेमांव हांचे हस्तुकीं बुधवारा सुरू केलें. लोकांची खूब आदीं सावन प्रलंबीत आशिल्ली मागणी आतां फळादीक जातली अशें विरोधी पक्ष फुडारी युरी आलेमांव हांणी सांगलें. अपघात जावचें न्हय, म्हूण राज्यभरातले ‘ब्लॅक स्पाॅट्स’ पयस करपाची गरज आसा, अशेंय तांणी सांगलें.
‘‘ह्या प्रकल्पांत वॉकिंग ट्रॅक आनी बांक आसतले, जाका लागून सांजवेळा भोंवपाक आनी विसव घेवपाक योग्य सुवात मेळटली. थळाव्या लोकांचे जिणेचो दर्जो सुदारपा खातीर हो उपक्रम आकार घेतना पळोवन म्हाका आयज खोस जाता. लोकांच्या सहकार्याक लागून आयज तें घडत आसा, अशें आलेमांव हांणी सांगलें.
ह्या कामा वांगडाच अपघात जावपी वाठाराचेर उपाय काडटले, अशें तांणी सांगलें. राज्यभर तरेकवार कारणांक लागून अपघात जायत आसात. हाका कांय ब्लॅक स्पॉट आनी इबाडिल्ली रस्तो अभियांत्रिकी जापसालदार आसा. हीं उदरगतीचीं कामां करतना ह्या प्रस्नांचेर उपाय काडटले, अशें आलेमांव हांणी सांगलें.
खुबशा तरणाट्यांक रस्तो अपघातांत मरण येता, हे खातीर सरकारान अपघात आळाबंद हाडपाची गरज आसा अशें आलेमांव हांणी सांगलें.
हांवें हो विशय गंभीरतायेन घेतलो आनी विधानसभा अधिवेशन तशेंच हेर मळांनीय आवाज काडला. रस्त्यार किड्या सारके लोक मरत आसात. अपघात थांबपाक जाय, अशें तांणी सांगलें.
नव्या प्रकल्पा विशीं उलयतना तांणी सांगलें, लोक ताचो वापर भलायकी फायद्या खातीर करूंक शकतात. हो प्रकल्प चलपाक आनी भलायकी बरी दवरपाक उपेगी थारतलो. म्हजें कार्यालय हीं कामां योग्य वेळार जातात काय ना हाचेर नदर दवरून आसात आनी थारायिल्ल्या वेळांत तीं पुराय जातलीं असो म्हाका विस्वास आसा अशें आलेमांव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
