भांगरभूंय | प्रतिनिधी
फाटल्या 30- 35 वर्सांच्या काळांत गोंयांत शेंकड्यांनी लोक अपघातांत सोंपल्यात. ताचे पयलीं अपघात जाताले. मात, गाडयांचो आंकडो वाडत गेलो, तशे अपघातूय वाडले. वर्साक तिनशे वयर लोकांक मरण येवपाक लागलें. ताचे दुपेटीन जखमी जावंक लागले. अजून हें चालूच आसा. अंदूं 14 सप्टेंबर मेरेन गोंयांत 1824 अपघात जाल्यात. 167 जाणांक मरण आयलां. 187 गंभीर जखमी जाल्यात. 369 ल्हान अपघातांनी 566 जाणांक दुखापत जाल्या. 1495 अपघातांनी गाडयांचे व्हड लुकसाण जालां. 2021 ते 2023 मेरेन दुचाकी अपघातांत 541 जाणाक जीव व्हगडावचो पडला. तातूंतल्या 357 जाणांनी हॅल्मॅट घालूंक नाशिल्लें. हे आंकडेवारी वयल्यान गोंयांतल्या अपघातांचो आंकडो आसा तसोच आसा, हें कोणूय सांगतलो. खूब हुस्क्याची गजाल. कारण मरप्यां मदीं चडशे तरणाटे आसा. देशाचे आधारस्तंभ म्हणूं येतात, अशे.
सरकारी यंत्रणां, समाजाचें हाचेर गंभीर चिंतन जाय. उपाय काडपाक जाय.
रस्त्याची बाबत अवस्था, काळोख, गोरवां, सुणीं हीं कांय कारणां आसात. पूण ताचे परस येरादारीचे नेम पाळप ना, मन लावन गाडी चलोवप ना, ती वेगान, नशेंत, जागरणां करून चलोवप ह्या कारणांक लागून चड अपघात जाल्यात. तातूंत कोणा एका गाडयेकाराची चूक आसता, हें अपघात प्रत्यक्ष पळोवपी वा ताचो व्हिडियो सोशल मिडियाचेर पळोवपी सांगतात. चुकीचे दिशेन येवन फुडल्यान येवपी गाडयेक धपको दिवन मरण आयिल्ले आसात. तशेंच नशेंत कश्या कशीय गाडी चलोवन दुसऱ्याक फोंडांत घालपीय आसात. पोरूं भाणस्तारी पुलार जें कितें जालें, तें तर म्हाभिरांकूळच आशिल्लें. कांय रस्ते बाबत आसातूच, फोंडकुलांय आसात, पूण सादुरतायेन गाडी चलोवंक ना जाल्यार अपघात जातलोच, तुका ना जाल्यार फुडल्यान, फाटल्यान आशिल्ल्याक! पुलिसांनी नेमां बाबतीत कडक धोरण आपणायले बगर ही बेफिकीरी उणी जावची ना. आतां पर्यटन मोसम तेंगशेर पावला. पर्यटक येतले. गाडी चलयतना कोण मस्ती करचे नात, हें बारीकसाणेन पळोवचें. अल्कोमिटरांचो आंकडोय वाडोवचो. येरादारी पुलिसांच्या दरेका पंगडा कडेन दोन तरी अल्कोमिटर आसुंदी. आपचलीत सिग्नलांक लागून कोण नेम मोडटात, तें कळटा. तांकां आपशीच तालांवूय पडटा. मात तो ते भरतात काय नात, हें कोण तपासता? हांगा वर्साचो विमो पसून भरूंक नाशिल्ले गाडयेकार आसतले.
14 ते 20 ऑक्टोबरा मजगतीं येरादारी संचालनालय 13 वें रस्तो सुरक्षा सप्तक मनयतलें. तें वर्साक चार फावटी मनोवपाची गरज आसा. पणजे डाॅन बाॅस्को सभाघरांत रस्तो सुरक्षा प्रदर्शन जालें. त्या वेळार येरादारी उपसंचालक संदीप देसाय हांणी वेगळो विचार मांडलो. गाडी गरज म्हूण चलयली जाल्यार लोक ती जापसालदारकेन चलयतले. पूण मजा, मस्ती खातीर चलयली जाल्यार अपघात जातले. दरेका चलोवप्यान हाचेर विचार करचो. तशी गाडी आयज कांय जाणांची गरज जाल्या. कारण भौशीक येरादारी सेवा दिवपी बसी वेळार येतल्यो, सुट्टल्यो, पावतल्यो हाची खात्री प्रत्यक्ष देव पसून दिवपाक शकचो ना. पणजे सिटी बसींचें एक उदाहरण पुरो. तातूंत विकासकामां खातीर वर्साचीं वर्सां रस्त्यांचेर, कुशीक कितें ना कितें काम चालू आसता. अपघातूय जाल्ले आसतात. तातूंत आयतार, सुटयेच्या दिसा, सणां- परबांक बसी बंद आसतात. मदीं दांडी मारतात. देखून आतां चडशे लोक स्वताची गाडी घेवन भोंवपाक लागल्यात. आडवाटेच्या गांवांनी रावपी लोकांक तर सदची बस खात्रेन मेळटली हाची खात्री नासता…. अशा साबार कारणांक लागून दरेक तरणाटो नोकरी मेळ्ळी काय पयलीं गाडी विकत घेता.
देसाय हांच्या मतान साठ टक्के अपघातांनी मरण येवपी तरणाटे हे 18 ते 26 वर्सां पिराय गटांतले. नोकरी करिनाशिल्ले भुरगे मजा, मस्ते खातीर दुचाकी चलयतात. पर्यटकांचोय हातूंत आस्पाव आसा. गोंयांत मजा करपाक आयला म्हणटकच तो मजा, मस्ती करितूच गाडी चलयता आनी अशा वेळार अपघात जावं येता. गोंयां पावले काय भोवतेक पर्यटकांच्या कानांत वारें भरता. मागीर गाडयेंत बियर वा सोऱ्याच्यो बाटल्यो घेवन, पदां म्हणीत, दारां उक्तीं करून ते गाडयो चलयतात. सगल्यांनीच शिस्तींत, सांबाळून गाडी चलयत आनी ती गरज आसता तेन्नाच भायर काडीत जाल्यार सहसा अपघात जावचे नात. मजा, मस्ती करपाक गाडी चलयल्यार अपघात जावपाची शक्यताय 99 टक्के आसता, अशेंय तांणी सांगलें. गरजे वेळारूच गाडी भायर काडल्यार अपघात, येरादारीची गचमुड्डी उणी जातली. मात ते खातीर भौशीक येरादारी निटायेर घालची पडटली, वाडोवची पडटली. येरादारी खात्यान हें मनार घेवचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
