अपघात उणे करप अशक्य?

भांगरभूंय | प्रतिनिधी

आपूण स्वता संवसारांत सगल्यांत बरो गाडी चलोवपी आसलो तरी फुडल्यान, फाटल्यान येता तो आबूज प्राणी आसपाक शकता, हाचो तांकां विसर पडटा.

रस्तो सुरक्षा मंडळाची बसका सचिवालयांत जाली. तातूंत अपघातांत मरण आयिल्ल्यांच्या कुटुंबाक 10 लाख रुपया लुकसाण भरपाय दिवपाचो प्रस्ताव मान्य जालो. सध्या 2 लाख मेळटाले. अपघातांत हांसपी- खेळपी संवसार उध्वस्त जातात. जोडकार भायर पडलो जाल्यार कितें भोगता, तें त्या कुटुंबाकूच खबर. गोंया सारक्या राज्यांत दीस काडपाक तिगांच्या कुटुंबाक म्हयन्याक 30 हजार रुपया तरी जाय. शिक्षण, भलायकी, मनोरंजन, सण- परबो, लग्नां, स्वताची दुचाकी, गाडी, जेवण- खाण… हाचेर हेर राज्यां परस गोंयांत चड खर्च जाता. कारण हांगां म्हारगाय आसा. राहणिमानूय उंचेलें. कुटुंबाचो फुडार काळखी जाल्ल्यान ताका परतून उबे रावपाची संद मेळची म्हूण सरकारान कांय वर्सां पयलीं अपघातांत मरण आयल्यार कुटुंबाक अर्थीक मजत करपाचो निर्णय घेतिल्लो. ती रक्कम उणी दिशिल्ल्यान आतां ती 10 लाखां मेरेन वाडयल्या. खरें म्हणल्यार ती 25 लाख रुपया करपाक जाय. मागीर विमो कंपनी कडल्यानूय कुटुंबाक मनस्ताप, धांवपळ करिनासतना मजत मेळपाक जाय…. आनी हे 25 लाख रुपया गोंया सारक्या राज्यांत चड न्हय.
गोंयांत अपघात वाडले ते 1980 च्या दसकांत. घडये राज्यपाल गोपाल सिंग आसतले, जांणी गोंयचो उल्लेख किलर स्टेट असो केल्लो. एके आंकडेवारी प्रमाण, राज्यांत वर्साक सादारण तिनशे लोकांक मरण येता खंय. वर्साक दोनशेच धरल्यार फाटल्या 30 वर्सांच्या काळांत कितले जाले तें मेजचें! दोन म्हयन्यां पयलीं गोंय पुलिसांनी अपघातांची आंकडेवारी जाहीर केल्या. ताचे प्रमाण, 2019 ते 2023 म्हणल्यार पांच वर्सांनी 1307 लोकांक मरण आयलां. 50 टक्के अपघात गांवांतल्या रस्त्यांचेर जाल्यात. अर्थांत हाका वेगळींवेगळीं कारणां आसात. स्वता पडून, गोरवांक आपटून, सुणो मदींच आयिल्ल्यान, गाडयेक आदळून लोकांक जीव व्हगडावचो पडला. 37 टक्के लोकांक राष्ट्रीय म्हामार्गाचेर जाल्यार 13 टक्के लोकांक राज्य म्हामार्गांचेर मरण आयलां. हातूंतले 70 टक्के लोक दुचाकी चलोवपी आशिल्ले. फाटल्यान बशिल्लेय संवसाराक अंतरल्यात. 13 टक्के चलून वचपी आशिल्ले. गाडी मोखिल्ल्यान तांकां मरण आयलें. 2021 ते 2023 ह्या काळांत 541 दुचाकी अपघातांत गेल्यात. तातूंतल्या 357 जाणांनी हॅल्मेट घालूंक नाशिल्लें. हे आंकडेवारींत जखमी जाल्ले, कायमचे दिव्यांग जाल्लेय आसतले. म्हणजे अपघाताचें हें विश्व कितलें भिरांकूळ ताची कल्पना करची.
अपघात ह्याच रस्त्याचेर जातात, त्या रस्त्याचेर कमी जातात, अशें म्हणून कोणाकूच हात फाफडूंक मेळचें ना. उदक नाका मेरेन आयलां. कितें तरी उपाय घेवप गरजेचें. रस्ते ही मुखेल समस्या. तांचे अवस्थे विशीं सगल्यांकूच खबर आसा. काॅण्ट्रेक्टरांचेर कितें कारवाय जाली, ताची मात म्हायती लोकांक ना. वाटेर गोरवां बशिल्लीं आसतात, सुण्यांचोय धुमाकूळ आसता. ताचेरूय धनयाक दंड दिवपाचो निर्णय जाल्लो. तो बेगीन चालीक लागचो. गोरवां खंय बशिल्लीं आसतात, तें थळाव्या आमदारांक, नगरसेवकांक, पंचांक खबर आसतलेंच. वाटेर लायटी पेटिल्ल्याे नासतात. लोकूय सांजेच्या वेळार काळे, कुड्ड्या रंगाचे कपडे घालून भोंवतात. तांकां फाटल्यान गाडी येता, ताका आपूण दिसचो ना, हाचें भानूच नासता. मोबायलाक लागून ड्रायव्हरांची नदर पिड्ड्यार जाल्या. येरादारीचे कोंयडेक लागून बेजारिल्ले ड्रायव्हर शक्य आसा थंय जाता तितल्या वेगान गाडी चलयतात. दुचाकी चलोवपीय हाका आडवाद नात. तांचो बेफिकीर सभावूय नडटा. आपूण स्वता संवसारांत सगल्यांत बरो गाडी चलोवपी आसलो तरी फुडल्यान, फाटल्यान येता तो आबूज प्राणी आसपाक शकता, हाचो तांकां विसर पडटा. परिणाम अपघात.
अपघात जातकच लुकसाण भरपाय म्हूण त्या कुटुंबाक अर्थीक मजत दिवप योग्यूच. पूण ताचेच बाराबर अपघातूच उणे जातले, हाचे खातीर कितें तरी करप चड म्हत्वाचें. भौशीक येरादारी निटायेर घालीत जाल्यार गाडयो घेवन भोंवप्यांचो आंकडो देंवतलो. रस्ते आडावपाचे प्रकारूय वाडल्यात. मिरवणुको, कार्यावळीं खातीर रस्त्याचो वा रस्त्याच्या देगांचो वापर करप चुकीचें. हाचो मानसीक परिणाम ड्रायव्हरांचेर जाता. येरादारीची समस्या जाग्यार घालपा खातीर साबार निर्णय रस्तो सुरक्षा मंडळाचे बसकेंत जाल्यात. उपाय सुचोवपाक विवीध खात्यांक सांगलां. लोकांचीय मजत घेवची. सोरो पियेवन गाडी चलोवपी आतां दोन म्हयने सांपडटले. तांचेर कारवाय जाय. ब्लॅक स्पाॅट्स दुरुस्त करचे. येरादारीचे नेम हायस्कुलांनी शिकोवचे. अपघात उणें करपाक ड्रायव्हरांनीच चड शिटूक जावपाची गरज आसा.