भांगरभूंय | प्रतिनिधी
अहमदाबाद, खबरां संस्था: ‘‘विमानान टेकऑफ घेतले उपरांत साधारण फुडल्या ३० सेकंदांनीच खूब व्हड आवाज येवपाक लागलो आनी विमान कोसळ्ळें. ह्यो सगल्यो घडामोडी खूब वेगान घडल्यो.’’ अहमदाबादाक जाल्ल्या भिरांकूळ विमान अपघातांतल्यान वाटवल्लो एकटोच प्रवासी विश्वास कुमार रमेश सांगतात. हॉस्पिटलाचे बॅडीचेर न्हिदून त्याच विमानांत प्रवास करपी आपल्या भावाक ते सोदताले.
३९ वर्सांचो विश्वास रमेश हो भारतीय वंशाचे ब्रिटीश नागरीक. तो दीव हांगा आपल्या भावा वांगडा आयिल्लो. ताची घरकान्न आनी भुरगीं लंडनाक रावतात. अहमदाबादच्यान तो आपल्या भावा वांगडा भायर सरिल्लो. एअर इंडियाच्या विमानांत ११A ह्या सिटाचेर तो बशिल्लो. ताचे सयत विमानात वट्ट २४२ प्रवासी आशिल्ले. मेघानीनगर वाठारांत विमान कोसळल्या उपरांत तांचे मदले २४१ प्रवासी आनी विमानांतलया सगल्या क्रू मेंबर्सांक मरण आयलें. ह्या भिरांकूळ अपघातांत फकत विश्वास रमेश हो एकलोच वाटवलो.
विश्वास रमेश हांणी कितें पळयलें?
मजगतीं, हॉस्पिटलांत उपचार घेवपी विश्वास रमेश हांणी नेमकें कितें घडलें हाची म्हायती दिल्या. ‘‘विमानान टेकऑफ केलें उपरांत ३० सेकंदांत व्हड आवाज येवपाक लागले. उपरांत कांय खिणांतीच विमान कोसळ्ळें. हांव शुद्धीर आयलों तेन्ना म्हजे आशिकुशीक सगल्याक लोकांच्यो मेल्ल्यो कुडी आशिल्ल्यो. हांव बरोच भियेलों. हांव उठून उबो रावलों आनी धांवपाक लागलों. थंय सगल्याक विमानाचे कुडके पातळिल्ले. कोणें तरी म्हाका धरलो आनी ऍम्बुलन्सींत व्हेलो. थंयच्यान हॉस्पिटलांत हाडलो.’’ अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
