भांगरभूंय | प्रतिनिधी
भांगरभूंय । प्रतिनिधी
म्हापशेंः बस्तोडें हांगा ग्रीन पार्क जंक्शना कडेन जाल्ल्या अपघातांत मरण आयिल्ल्या पीर्ण- बार्देश हांगच्या प्रकाश अनंत नायक हाच्या घरच्यांक विम्याचे 43 लाख 50 हजार रुयये दिवपाचो आदेश उत्तर गोंय मोटर वाहन अपघात लवादान संबंदीत विनो कंपनीनक दिला. 2018 वर्सा मार्च म्हयन्यांत व्हो अपघात जाल्लो. प्रकाश नायकाची घरकान्न प्रतिमा नायक हिणे मार्च 2019 वर्सा रॉयल सुंदरम जनरल इन्सुरन्स कंपनी, अपघात करपी पीकअप ड्रायव्हर पांडुरंग कांबळे (कोल्हापूर) वाहन धनी सुशांत कांबळी (कोल्हापूर) हाचे आड लवादा कडेन लुकसाण भरपाय दिवपा खातीर दावो केल्लो.
अपघातांत मरण आयिल्लो प्रकाश नायक सरकारी उदकास्रोत खात्याचो कर्मचारी आशिल्लो. ताच्या फाटल्यान घरकान्न आनी चार सान भुरगीं आसात. अपघात जालो तेन्ना तो 53 वर्सा पिरायेचो आशिल्लो. तेन्ना आशिल्लो सरकारी पगार आनी हेर गजालींचो नियाळ लवादान सुनावणे वेळार घेतलो. 6 टक्के कळंतरा यसत 43 लाख 50 हजार रुपये प्रतिमा नायक हिका दिवपाचो आदेश लवादाचो वांगडी एडगर फर्नांडीस हाणे दिली. दाव्याची रक्कम एका सप्तका भितर लवादा कडेन जमा करपाक विमो कंपनीक सांगलां.
18 मार्च 2018 दिसा सांजे 7.45 च्या सुमाराक ग्रीनपार्क जंक्शना कडेन प्रकाश नायक चलयतालो ते एक्टिवा स्कूटरीक एमएच 09 ईएम 2290 ह्या अशोक लेलंड पीकअपीन धपको दिल्लो आनी नायक हाका जाग्यारूच मरण आयिल्लें. ताची घरकान्न प्रतिमा नायक गंभीर जखमी जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
