भांगरभूंय | प्रतिनिधी
पणजीः झुजांत, आतंकवादी हल्ल्यांत मरण आयिल्ल्या वा जखमी आनी दिव्यांग आशिल्ल्या सैनिकांक दिल्ल्या सानुग्रह अनुदानांत (एक्स-ग्रॅशिया) दुपेटी परस चड वाड राज्य सरकारान केल्या. ते प्रमाण झुजांत मरण आयिल्ल्या सैनिकांच्या लागसारच्या कुटुंबांक 25 लाख रुपया मजत दितले. गृह मंत्रालयान हालीं हे विशींची अधिसुचोवणी जारी केल्या. पयलीं ही मजत 10 लाख रुपया आशिल्ली.
अधिसुचोवणे प्रमाण, आंतरराष्ट्री झुजांत, देशाच्या शिमे वयल्या वाठारांनी झगड्यांत वा आतंकवादी, बंडखोर वा अतिरेकी हांचे आड कारवाय करतना सैनिकाक मरण आयल्यार ताच्या लागींच्या कुटुंबाक 25 लाख रुपयांची मजत मेळटली. पयलीं ही रक्कम 10 लाख रुपया आशिल्ली. जवान दिव्यांग जाल्यार ताका 7.5 लाख रुपया अर्थीक मजत दितले. हाचे पयलीं ही रक्कम 3 लाख रुपया आशिल्ली.
वयल्यो घडणुको सोडल्यार जवान आपलें कर्तव्य करतना चुकून मरण आयलें जाल्यार ताच्या लागींच्या कुटुंबाक 20 लाख रुपया भरपाय दितले. पयलीं ही रक्कम 8 लाख रुपया आशिल्ली. अपघातांत जवान दिव्यांग जाल्यार ताका पांच लाख रुपया अर्थीक मजत दितले. हाचे पयलीं ही रक्कम 2 लाख रुपया आशिल्ली.
हाचे वांगडा आतंकवादी वा असामाजिक घटकांच्या कारवायेंत जवानाक मरण आयलें जाल्यार ताच्या लागींच्या कुटुंबाक 20 लाख रुपयांची मजत मेळटली. पयलीं ही रक्कम 8 लाख रुपया आशिल्ली. अशा कारवायांनी जवान अपघात जावन दिव्यांग जालो जाल्यार ताका पांच लाख रुपया अर्थीक मजत दितले. हाचे पयलीं ही रक्कम 2 लाख रुपया आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
