भांगरभूंय | प्रतिनिधी
येरादारी मंंत्री मॉवीन गुदिन्होन घेतली केंद्रीय मंंत्री नितीन गडकरींंची भेट
पणजी : राज्यांत अपघातांचें प्रमाण वाडत आसा. वाडटे अपघात आनी अपघाती मरणांचो तज्ञां वतीन अभ्यास करून उपाय येवजण्यो सुचोपाची मागणी राज्यान केल्या. येरादारी मंत्री मॉवीन गुदिन्हो हांंणी दिल्लीत केंद्रीय रस्ते येरादारी आनी म्हामार्ग मंत्री नितीन गडकरी हांंची भेट घेतली. हे भेटींत तांंणी ही मागणी केली.
केंद्रीय रस्ते आनी म्हामार्ग मंंत्री नितीन गडकरी हे 12 जूनाक गोंयांत येवपाचे आसात. अपघातांंचे वाडटे प्रमाण भिरांंकूळ आसा. वाडट्या अपघातांंचेर गोंंयांंत चर्चा करपाचे आस्वासन नितीन गडकरी हांणी राज्याच्या येरादारी मंंत्र्यांक दिलांं. येरादारी मंंत्री मॉवीन गुदिन्हो हांंणी ही म्हायती दिली.
दाबोळी विमानतळ ग्रेड सेपरेटर ते केणीनगर मेरेन फ्लायओव्हराचो बुन्यादी फातर 12 जूनाक बसोवपाचो आसा. हे कार्यावळीक केंद्रीय रस्ते आनी म्हामार्ग मंंत्री नितीन गडकरी हाजीर रावपाचे आसात. 650 कोटींचो हो प्रकल्प आसा. बुन्यादी फातराच्या कार्यावळीचें आमंत्रण येरादारी मंंत्र्यांनी नितीन गडकरींंक दिलां.
राज्यांंत अपघातांंचें प्रमाण दिसान दीस वाडत आसा. हॅल्मेट सक्तीची कार्यवाही करपा सयत सोरो पियेवन गाडी चलोवप्यांचेर लेगीत कारवाय सुरू केल्या. हे उपाय सुरू आसले तरी अपघातांचें प्रमाण वाडत आसा. वाडट्या अपघातांंचेर दिल्लींत येरादारी मंंत्र्यांनी चर्चा केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
