भांगरभूंय | प्रतिनिधी
मुख्यमंत्री: नव्या वर्साचे येरादारी नियंत्रणा खातीर आराखडे तयार
पणजी, प्रतिनिधी : वाडपी अपघातांचेर नियंत्रण दवरपाक ज्यो उपाय येवजण्यो पुलीस तशेंच येरादारी खात्यान सुचयल्यात ताचे कार्यवायेक २ म्हयने लागतले. भौशीक बांधकाम खात्यान स्पीड ब्रेकर घालपा सयत रस्त्यांचेर बेरिकेडींग करपाच्या कामाक सुरवात केल्या. स्पीड ब्रेकर, बेरीकेडींग तशेंच हेर उपाय येवजणेंची कामां सुरू आसा, अशें मुख्यमंत्री डॉ. प्रमोद सावंत हांणी सांगलें.
आल्तिनो हांगा कारखानो आनी बाश्पक खात्याचे नवे इमारती खातीर आयज बुनयादी फातोर घातलो. बुन्यादी फातर घालपाचे कार्यावळींत मुख्यमंत्र्यांनी ही म्हायती दिली.
राज्यांत अपघातांचें प्रमाण वाडत आसा. शिरदोण हांगा बुधवारा सकाळीं जाल्ल्या अपघातांत एके चलयेक जाग्यारूच मरण आयलें. दर दिसा पुराय राज्यांत ल्हान व्हड अपघात घडतूच आसतात. ह्या अपघातांचेर नियंत्रण दवरपा खातीर सरकारान येरदारी खातें तशेंच भौशीक बांदकाम खात्याक उपाय येवजण्यो करपाक सांगलां. भौशीक बांदकाम खात्यान उपाय येवजण्यांची कार्यवाय करपाक सुरवात केल्या. दोन दिसां पयलीं बसका घेवन हांवें हे विशीं नियाळ घेतला, अशें मुख्यमंत्र्यांनी सांगलें.
नातलां आनी नवें वर्स लागीं पाविल्ल्यान राज्यांत येवपी पर्यटकांचो आंकडो वाडत आसा. हाका लागून येरादारीची कोयंडी जावपाक लागल्या. नव्या वर्साक येरादारी वेवस्थापना खातीर पुलीस आनी येरादारी खात्यान येरादारी वेवस्थापन आराखडे तयार केल्यात. येरादारी पुलीस अधीक्षक नवे आसले तरी येरादारी वेवस्थापनाकडेन लक्ष दिवपाक तांणी सुरवात केल्या, अशें मुख्यमंत्री डॉ. प्रमोद सावंत हांणी फुडें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
