भांगरभूंय | प्रतिनिधी
ऐनवेळार काँग्रेसीन उमेदवारी न्हयकारली
पेडणें: काँग्रेस पक्षान 2027चे वेंचणुकेंत मांद्रेंच्या आमदाराक वाटावपा खातीर काँग्रेसीन जिल्हो पंचायतीचे वेंचणुकेंत काँग्रेसीचो बळी दिल्ल्याचो आरोप काँग्रेसीचे म्हणयारे देवेंद्र प्रभुदेसाय हांणी केलो. धारगळ जिल्हो पंचायत मतदारसंघांतल्यान काँग्रेसीचे इत्सूक उमेदवार म्हूण ज्ञानेश्वर यशवंत शिवाजी हांच्या नांवाची चर्चा आशिल्ली. तांणी प्रचाराक लेगीत काँग्रेसी वतीन सुरवात केल्ली. पूण ऐनवेळार सोमारा काँग्रेस पक्षान ज्ञानेश्वर शिवाजी हांकां उमेदवारी न्हयकारली असो दावो पत्रकारां कडेन उलयतना प्रभुदेसाय हांणी केलो.
काँग्रेसीचे म्हणयारे देवेंद्र प्रभुदेसाय हांच्या फुडारपणा खाला खूबश्या काँग्रेस वावुरप्यांचे हाजिरेंत अपक्ष उमेदवार म्हूण ज्ञानेश्वर शिवाजी हांणी उमेदारी अर्ज दाखल केलो.
काँग्रेस आनी गोवा फॉरवर्ड ह्या दोन पक्षां मदीं युती जाल्या. सोमारा राष्ट्रवादी काँग्रेसी वतीन धारगळ मतदारसंघांतल्यान अनिकेत साळगांवकार आनी मोरजी मतदारसंघांतल्यान शिल्पा म्हामल हांणी उमेदवारी अर्ज दाखल केल्या. तेच फाटभुंयेर काँग्रेस पक्षाचेर निरशेवणी उक्तायत देवेंद्र प्रभुदेसाय आनी तांच्या समर्थकांनी ज्ञानेश्वर शिवाजी हांकां अपक्ष उमेदवार म्हूण अर्ज दाखल करून काँग्रेस पक्षाचेर खर टिका केली.
देवेंद्र प्रभुदेसाय हांणी म्हणलें, फाटले विधानसभा वेंचणुकेंत काँग्रेस पक्षाच्या थळाव्या कार्यकर्त्यांक विस्वासांत घेनासतना ह्याच मतदारसंघांतल्यान गोवा फॉरवर्ड पक्षाक उमेदवारी दिल्ली. त्या वेळार गोवा फॉरवर्डाक फक्त 1600 मतां मेळिल्ली. तांचे कडेन कसलीच संघटणा ना. बूथ संघटणा ना. ताचो परिणाम म्हूण थोडीशीं मतां गोवा फॉरवर्डाक मेळ्ळीं.
ज्ञानेश्वर शिवाजी हांकां उमेदवारी दितले अशें उतर काँग्रेसीन दिल्लें. तेप्रमाण तांणी एका म्हयन्या सावन आपलो प्रचार धारगळ मतदारसंघांतल्यान केल्लो. पूण ऐनवेळार काँग्रेस पक्षान तिकेट न्हयकारिल्ल्यान खूबश्या समर्थकांनी तेंको दिवन अपक्ष उमेदवार म्हूण वेंचणुकेंत देंवचें असो निश्चेव नागरिकांनी केल्ल्याचें देवेंद्र प्रभुदेसाय हांणी सांगलें.
उमेदवार ज्ञानेश्वर शिवाजी हांणी आपली प्रतिक्रिया उक्तायतना आपल्याक मेळत आशिल्ल्या तेंक्याचेर आपूण जैतीवंत जातलो असो दावो केलो.
ह्या वेळार कॉंग्रेसीचे ज्येश्ठ कार्यकर्ते आदले सरपंच प्रदीप देसाय, पंच सुनिता देसाय आनी हेर कार्यकर्ते हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
