भांगरभूंय | प्रतिनिधी
खावपाचे जिन्नस विकपी २६ दुकानां आनी गाड्यांची केली तपासणी
पणजी : गोंयांत अन्न सुरक्षेचे नेम घटमूट करपाच्या हेतान अन्न आनी वखदां प्रशासन संचालनालयान आयज पणजेच्या केटीसी बस स्टॅण्ड वाठारांत विशेश तपासणी मोहीम राबयली. हे मोहिमेंत खावपाचे जिन्नस विकपी वट्ट २६ दुकानां आनी गाड्यांची तपासणी केली. हे मोहिमे मजगतीं कांय विक्रेत्यांनी फाटले तपासणे उपरांत नितळसाणे विशीं बरीच सुदारणा केल्ल्याचें एफडीएच्या अधिकार्यांक दिसलें. तशेंच, आंतरराज्य बसस्टॅण्ड वाठारांत हुंदरांचो त्रास गंभीर स्वरूपांत दिसून आयिल्ल्यान, ह्या वाठारांतल्या ७ वेवसाय बेगोबेग बंद करपाचे आदेश दिले. जो मेरेन वाठारांतली स्थिती सुदरना तो मेरेन ह्या खावपाच्या जिन्नसांक परत सुरू करपाक बंद घाली.
फूड सेफ्टी ऍक्ट २००६ च्या कलम ६९ खाला कारवाय करीत तीन विक्रेत्यांचेर प्रत्दरेकी १० हजार रुपया, जाल्यार हेर दोन विक्रेत्यांचेर दरेकी ५ हजार आनी २ हजार असो दंड आयकयलो. तशेंच, केटीसी वाठारांतल्या चार स्टॉल चालकांक नितळसाण पाळूंक नाशिल्ल्यान दरेकी ५ हजारांचो दंड दिलो. कलम ३२ खाला सुधारणा नोटीसोय दिल्यो. फुडल्या सप्तकांत परत फेरतपासणी करतले.
ही कारवाय एफडीएची संचालक श्वेता देसाय हांच्या मार्गदर्शना खाला तशेंच रिचर्ड नोरोन्हा हांच्या नेतृत्वाखाला श्रद्धा खुदकर, अंकिता पालयेंकार, प्रितम परब, साफीया खान, लेनिन डिसा आनी अमित मांद्रेंकार ह्या अधिकार्यांनी केली. ह्या वेळार केटीसी डेपो वेवस्थापकूय हजर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
