अन्नू राणी, पारूल चौधरीक भांगरा पदकां

भांगरभूंय | प्रतिनिधी

19वे आशियायी खेळां सर्तीच्या 10व्या दिसा भारतान दोन भांगरा पदकां जिखलीं. बायलांच्या भालो फेक खेळांत अन्नू राणीन 62.92 मिटरा मेरेन फालो मारून भांगरा पदक जिखलें, जाल्यार पारुल चौधरीन 5000 मिटराचे धांवपाचे सर्तींत भांगरा पदक जोडलें. अन्नू आनी पारूल हांणी मेळयिल्ल्या पदकां उपरांत भारताच्या भांगरा पदकाची संख्या 15चेर पावली. भारतान 15 भांगरा पदकां, 26 रुप्या पदकां आनी 28 कांश्या पदकां मेळून वट्ट 69 पदकां आपल्या नांवार केल्यात.

भारतान काल दोन भांगरा पदकां खेरीत दोन रुप्या पदकां आनी पांच कांश्या पदकां जिखलीं. हातूंतली स पदकां अॅथलेटिक्सांतल्यान आयली. बॉक्सिंगेंत दोन आनी केनोयिंगांत एक पदक मेळ्ळें.

मिडल डिस्टन्स धांवपी पारुल चौधरीन बायलांच्या 5000 मिटर रेसींत पयली सुवात मेळयली. हातूंत भांगरा पदक जिखपी ती भारताची पयली बायल अॅथलीट थारली. सर्त पुर्ण करपाक तिका 15 मिनटां, 14ः75 वेळ लागलो. जापानाची रिरिका हिरोनाकाक (15ः15ः34) रुप्या पदक आनी कजाकिस्तानाचे करोलीन (15ः23ः12) कांश्या पदक फावो जालें.

अन्नून कालच्या दिसाचें दुसरें भांगरा पदक जिखून दिलें. तिणें 62.92 मिटर फालो फेक केलो. रुप्या पदक श्रीलंकेचे नदीशा दिलहानाक फावो जालें. तिणें 61.57 मिटरा मेरेन भालो फेक केलो. कांश्या पदक चीनाचे हुई हुई हिणें जिखलें. तिणें 61.29 मिटरा मेरेन भालो मारलो.

अर्जुन सिंग-सुनील सलाम जोडयेक कांशें

भारतान कालच्या दिसातलें पयलें पदक कॅनो प्रकारांत फावो जालें. अर्जुन सिंग आनी सुनील सिंग सलाम हे जोडयेन दादल्यांच्या कॅनो 1000 मिटर डबल इव्हेंटांत कांश्या पदक जिखलें. भारताचे जोडयेन 3ः53ः329 सेकंदांनी सर्त पुर्ण केली. आशियायी खेळाच्या इतिहासांत भारतान ह्या खेळां प्रकारांत मेळयिल्लें हें दुसरें पदक आसा. सिजी सदानंदन आनी जॉनी रोमेल हे जोडयेन 1994त हिरोशमा खेळां सर्तींत भारताक कांश्या पदक मेळोवन दिल्लें. मजगतीं, उजबेकिस्तानाचे शोखमुरोद खोलमुरादोव आनी नुरिस्लोम तुखतासिन हे जोडयेन भांगरा पदक जिखलें, जाल्यार कजाकिस्तानाचे तिमोफे येमेलयानोव आनी सर्जी येमेलियानोव हे जोडयेक रुप्या पदक फावो जालें.

प्रिती सेमींत हारली, लवलीना फायनलींत

बायलांच्या 50-54 कील वजन बॉक्सींग गटांतले सेमी फायनलींत प्रितीक चीनाचे युआन चेंग हिच्या कडल्यान 5-0 अशा फरकान हार घेवची पडली. ताका लागून तिका कांश्या पदकाचेर समाधान मानचें पडलें. आशियायी खेळांतल्या बॉक्सींग प्रकारांत सेमी फायनलींत हारपी दोनूय खेळगड्यांक कांश्या पदक भेटयतात. मजगतीं, ऑलिम्पिकांत पदक जिखपी लवलीनान 66-75 कील वजन गटाचे फायनलींत सुवात मेळयली.

रामराजाक कांश्या पदक

बायलांचे 400 मिटर आडखळ रेसींत विथ्या रामराजान कांश्या पदक जिखलें. तिणें 55.68 वेळांत सर्त पुर्ण करून तिसरी सुवात मेळयली. बहरेनचे मुजिदात एकेकोयाक भांगर आनी चीनाचे मो जियाडीक रुप्या पदक फावो जालें.

बॅडमिंटनः प्रणय, सिंधूक जैत

दादल्यांच्या एकोड्या गटांत एच एस प्रणयान मंगोलियाच्या मुंखबताक 9-21 आनी 12-21 अशा फरकान हारोवन फुडले फेरयेंत सुवात मेळयली. प्रणयान फकत 25 मिनटांनी मॅच आपल्या नांवार केली. बायलांच्या एकोड्या गटांत सिंधून चीनी तायपेचे सू वेन-ची हिका 21-10 आनी 21-15 अशा सरळ गेमींनी हारयली.

बायलांच्या दोट्टी गटांत तनिशा-अश्विनी पोनप्पा हे जोडयेन लेगीत जैत जोडलें. भारताची जोडी 1-0 अशी मुखार आशिल्ली. त्या वेळार मालदीवाची मैसा इस्मायल-एेशत अफनान ही जोडी रिटायर्ड हर्ट जाली.

स्क्वॉशः दिपिका-हरिंदर जोडी मिश्र गटाचे सेमींत

दिपिका पल्लीकल आनी हरिंदर पाल सिंग हे जोडयेन स्क्वॉशाच्या मिश्र दोट्टी गटाचे सेमी फायनलींत सुवात मेळयली. भारताचे जोडयेन फिलिपिन्साचे जेमिका अरीबाडो-रॉबर्ट अॅण्ड्र्यू हे जोडयेक 2-1 फरकान हारयली. ह्या जैतान भारताचें पदक निश्चीत जालें.