भांगरभूंय | प्रतिनिधी
आयज 16 ऑक्टोबर. हो दीस संवसारभर संवसारीक अन्न दीस म्हूण मनयतात. संवसारभर वेगवेगळे दीस उमेदीन मनयतात. तातूंत अन्न दीस सामको म्हत्वाचो मानचो पडटा, कारण ताचो मनशाच्या जिविता कडेन, अस्तित्वा कडेन सरळ संबंद आसा. अन्न सुरक्षा संबंदीत एकंदर परिस्थिती पळयल्यार अन्न दिसा विशीची जागृताय वाडोवपाची गरज आसा. पूण आयज लेगीत आमी अन्न सुरक्षे विशीं आनी अन्नाचे नाशाडे विशीं गंभीर नात.
आमची संस्कृताय अन्न हें पूर्णब्रह्म म्हणटा. पूण आमी तें विसरत चल्ल्यात, काय कितें असो प्रस्न निर्माण जाला. हालींच एक अहवाल आयला. संयुक्त राश्ट्रांच्या पर्यावरण कार्यावळ आनी भागीदार संस्था डब्ल्यूआरएपीच्या अहवाला प्रमाण आमच्या देशांत दर वर्सा 6.8 कोटी टन धान्य फुकट वता. ताची नाशाडी जाता. हातूंतले 61 टक्के अन्न घरांतल्यान, 26 टक्के अन्न सेवा आनी 13 टक्के किरकोळ क्षेत्रांतल्यान नश्ट जाता.
भारता सारक्या शेतकी देशांत इतली व्हड प्रमाणांत अन्नधान्याची नाशाडी ही अभिमान दिसपा सारकी गजाल न्हय. भारता सारक्या विकसनशील देशांत, जंय साठ टक्के लोक दर दिसा उपाशी वा अर्द पोटार न्हिदतात, थंय अन्नधान्याचो असो नाश करप परवडपाचें ना. हें फुकट घाल्लें अन्न गरीब आनी उपाशी लोकांच्या तोंडांत पडलें जाल्यार देशांत कोणूच उपाशी न्हिदचो ना, पूण आमची संस्कृताय आमी विसरतात. आमकां जाय तितलें जेवण पानार वाडून तें खावप ही आमची परंपरा. खावन मद मारल्यार जाता, पूण अन्न भायर उडोवन मद करचो न्हय, अशें आमची आजी म्हणटाली हें आमी विसरल्यात. ती आमकां पानांत सांडपाक दिनासली.
अस्तंते कडल्या देशांनी हॉटेलांनी लेगीत पानांत अन्न सांडप हो समाजीक गुन्यांव मानतात. अन्न उडोवपी गिरेस्त लोकांक उपाशी लोकांची याद लेगीत येना. अन्न उडोवन हो गुन्यांव हाचें भान तें ताटांत सांडपी लोकांक कळना. देशांतले लाखांनी लोक आपल्या पोटांतलो भुकेचो उजो पालोवपा खातीर भीक मागतात.
आदिवासी, पयसुल्ल्या वाठारांनी लाखांनी लोकांक अजूनय फावो तें अन्न मेळूंक नाशिल्ल्यान तांचें कुपोशण जाता जाल्यार दुसरे वटेन दर दिसा लाखांनी टन अन्न भायर पडटा. ही विसंगती बदलची. हें अन्न गरीबांच्या तोंडांत वच्चें अशी वेवस्था आसपाक जाय.
हैदराबाद, चेन्नय, दिल्ली, कोलकाता, मुंबय, बेंगळुरू ह्या व्हड शारांनी गरिबांक उरिल्लें जेवण दिवपा खातीर हॉटेलां, रेस्टॉरंटांनी कम्युनिटी किचन संकल्पना चालीक लायल्या. ते प्रमाण शाराच्या वेगवेगळ्या वाठारांनी रस्त्यांचेर व्हडल्या फ्रिजांत उरिल्लें जेवण सांठोवन दवरतात. हे हाॅटेलांतलें अन्न, उश्टें न्हय. उपाशी लोकांनी ते व्हरचें अशी सुविधा ह्या केंद्रांनी आसा. पूण ही संकल्पना व्हडल्या शारांनीच आसा.
कम्युनिटी किचना सारकी संकल्पना दरेका शारांत चालीक लावची, जाका लागून फुकट वचपी अन्न गरिबांच्या तोंडांत पडटलें आनी अन्नाची नासाडी जावची ना.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
