भांगरभूंय | प्रतिनिधी
बागांतल्या हॉटेलाची एफडीए कडल्यान तपासणी
भांगरभूंय । प्रतिनिधी
म्हापशें: बागांतल्या एका हॉटेलांत अन्नांतल्यान विखबादा जाल्ल्या त्या सगळ्या 16 हॉटेल कर्मचाऱ्यांक उपचारा उपरांत हॉस्पिटलांतल्यान घरा धाडले. त्या सगळ्या कर्मचाऱ्यांचें नमुने अन्न आनी वखदां प्रशासना कडेन (एफडीए) धाडल्यात. तशेंच प्राधिकारणाच्या अधिकाऱ्यांनी त्या हॉटेलाची पळोवणी केली.
ही घडणूक मंगळारा दनपारां घडिल्ली. त्या हॉटेलांत पार्टे वेळार हॉटेल वेवस्थापना वतीन आपल्या कर्मचाऱ्यांक जेवण दिल्लें. ह्या जेवणांतल्यान हॉटेलाच्या सगळ्या कर्मचाऱ्यांक विखबादा जावन तांची भलायकी इबाडिल्ली. तातूंतल्या 16 जाणांक कांदोळेच्या खाजगी हॉस्पिटलांत दाखल केल्ले.
सुरवेक सगळ्या कर्मचाऱ्यांक हॉस्पिटल वेवस्थापनान अतिदक्षता विभागांत दवरिल्ले. बिरेस्तारा दनपारां त्या कर्मचाऱ्यांचे भलायकेंत सुदारणा जाले उपरांत तांचेर गरजेचे उपचार करून तांकां घरा धाडले. तांकां घरा कडेन देखरेखी खाला दवरल्यात.
मजगतीं, ह्या प्रकरणांत मारियानो फर्नांडीस (हणजूणें) ह्या कर्मचाऱ्याच्या पालकान कळंगूट पुलिशेंत हॉटेल वेवस्थापना आड कागाळ दाखल केल्या. हॉटेल वेवस्थापनान उणाक दर्ज्याचें जेवण दिल्ल्यान तातूंतल्यान आपल्या भुरग्या सयत हेरांक विखबादा जाल्ल्याचो तांणी दावो केल्लो. हे कागाळेच्या आदारान पुलिसांनी त्या सगळ्या दुयेंत कर्मचाऱ्यांची हॉस्पिटलांत वचून वासपूस केली. पुलिशेचे सुचोवणे वयल्यान हॉस्पिटल वेवस्थापनान सगळ्यांचें नमुने अन्न आनी वखदां प्रशासन खात्या कडेन धाडल्यात. ह्या नमुन्यांची तपासणी प्रशासन करतलें. तशेंच अन्न आनी वखदां प्रशासनाच्या अधिकाऱ्यांनी त्या हॉटेलाची पळोवणी केली आनी जखमी जाल्ल्या कर्मचाऱ्यांनी जेविल्ल्या जेवणाचे नमुने एकठांय केल्यात. एफडीआय कडल्यान त्या नमुन्यांची चांचणी जातली. ते उपरांत कर्मचाऱ्यांक जाल्ले विखबादेचें कारण स्पश्ट जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
