भांगरभूंय | प्रतिनिधी
न्यूयॉर्क, खबरां संस्था : सगळ्यांत चड 13 नामांकनां मेळिल्ल्या ‘एमिलिया पॅरेझ’ ह्या सिनेमाक फाटी घालून पयलेच खेपे सामके उण्या बजेटांत तयार केल्ल्या ‘अनोरा’ सिनेमाक सगळे म्हत्वाचे ऑस्कर पुरस्कार मेळ्ळ्यांत. उत्कृश्ट चित्रपटां सयत, उत्कृश्ट दिग्दर्शक, पटकथा, संकलन आनी उत्कृश्ट अभिनेत्री अशे पुरस्कार ह्या सिनेमाक फावो जाल्यांत. अंदूंच्या सुवाळ्यांत पयलेच खेपे पुरस्कार मेळोवपी फिल्मांचो आंकडो वाडलो.
फाटल्या कांय वर्सांत व्हड स्टुडिओंतल्या ब्लॉकबस्टर फिल्मां परस ऑस्करांत ‘इंडिपेण्डण्ट’ फिल्मांचें वजन वाडत आसा. अंदूंय तेंच चित्र दिसून आयलें. ‘अनोरा’ ह्या सिनेमा खातीर शॉन बेकर हांच्या नांवान नवो इतिहास नोंद जालो. एकाच सुवाळ्यांत एकाच मनशान सगळ्यांत चड चार पुरस्कार मेळोवपाचो वॉल्ट डिझ्ने हांच्या विक्रमा कडेन ताणें बरोबरी केली. 2004 वर्सा सावन समाजा खातीर निशिद्ध आनी दुर्लक्षीत विशयांचेर चित्रपट तयार करपी बेकर हांच्या सिनेमान सगळेच मुखेल पुरस्कार मेळयले.
मायकी मॅडिसन हाका ‘अनोरा’ ह्या सिनेमा खातीर उत्कृश्ट अभिनेत्रीचो पुरस्कार मेळ्ळो जाल्यार एड्रियन ब्रॉडी हाका ‘ब्रूटलिस्ट’ ह्या सिनेमा खातीर उत्कृश्ट अभिनेतो पुरस्कार फावो जालो. ब्राझीलाचो ‘आय एम स्टिल हियर’ सिनेमा उत्कृश्ट परभाशिक सिनेमा थारलो. ह्या गटांत लेगीत फ्रांस-जर्मनींतल्यान प्रवेश मेळिल्ल्या ‘एमिलिया पॅरेझ’ ह्या चित्रपटाक पुरस्कार मेळूंक ना.
झोई साल्डाना हाका उत्कृश्ट सहाय्यक अभिनेत्री आनी कॅमिली आनी क्लेमण्ट डुकॉल ह्या संगीतकार द्वयीक ‘एल माल’ गीता खातीर पुरस्कार फावो जालो. कैरन कल्किन हाका ‘ए रियल पेन’ ह्या सिनेमा खातीर उत्कृश्ट सहाय्यक अभिनेतो पुरस्कार फावो जालो. ‘फ्लो’ हो सिनेमा बेस्ट अॅनिमेटेड सिनेमा थारलो.
अंदूं वेगळें कितें?
फाटल्या दोन म्हयन्यांत ‘द सबस्टन्स’ फिल्मा खातीर चडशे पुरस्कार मेळोवपी डेमी मूर ऑस्कर पुरस्कारा भायर पडली. ‘ब्रूटलिस्ट’ आनी ‘विकिड’ ह्या दोनूय चित्रपटांक धा नामांकनां मेळ्ळीं. तांकां अनुक्रमान तीन आनी दोन पुरस्कारांचेर समाधान मानचें पडलें. परभाशिक चित्रपटां पसून ते अॅनिमेशन आनी संकलन ह्या गटांत पयलेच खेपे मानांकन मेळिल्ले कलाकार, चित्रपट बरें थारले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
