भांगरभूंय | प्रतिनिधी
दिवचलः केंद्र आनी राज्य सरकार एकठांय येवन समाजांतल्या दरेका घटकाची गतीन उदरगत करता. तेन्ना राज्यांतल्या अनुसुचीत जाती आनी जमातीच्या भाव-भयणींक मुखेल प्रवाहांत हाडपाचे यत्न सरकार करता. गोंय राज्य अनुसुचीत जमाती अर्थ आनी उदरगत म्हामंडळाच्या सहकार्यान वेगवेगळ्यो येवजण्यो सामक्यो परवडपी दरान उपलब्ध केल्यात.
अनुसुचीत जमातीं मदीं हिंदूं वांगडाच कांय क्रिस्तांव भाव-भयणी आसात म्हणून दरेका घरांत ह्यो येवजण्यो पावून शिक्षण आनी वेवसायांतल्यान तांकां मुखेल प्रवाहांत हाडपाक सगळ्यांनी सहकार्य करचें अशें मुख्यमंत्री डॉ.प्रमोद सावंत हांणी आवाहन केलें.
वेगवेगळ्या केंद्रीय आनी राज्य येवजण्यां संबंदीं जागृताय शिबिर आनी वेगवेगळ्या येवजण्यां खातीर मान्यताय पत्रां वांटपाची कार्यावळ गोंय राज्य अनुसुचीत जाती जमाती अर्थ आयोग उदरगत म्हामंडळान बाये सुर्लाच्या सांतेरी देवळांत घडोवन हाडली.
ह्या वेळार मेयेचें आमदार प्रेमेंद्र शेट, जिल्लो पंचायत वांगडी गोपाळ सुर्लीकार, सरपंच साईमा गावडे, म्हामंडळ संचालक दशरथ रेडकार, अध्यक्ष वासुदेव गावकार, वेवस्थापकीय संचालक दिपेश प्रियोळकार, संचालक विजय, थळावे पंच आनी हेर मानेस्त हाजीर आशिल्ले.
आयज लेगीत अनुसुचीत जमातींत हिंदू आनी क्रिस्तांव भाव-भयणींक जायत्या समस्यांक तोंड दिवचें पडटा. जायत्यो येवजण्यो आजून तांचे मेरेन पावूंक नात. जायत्या जाणांक दोन टक्के व्याज आनी 40 टक्के दलान वाहनां आनी हेर सुविधा दिल्या. हाचो प्रचार आनी प्रसार जावपाची गरज आसा आनी हाचे खातीर तांचेनी फुडाकार घेवप गरजेचें. ह्या भाव-भयणींक मुखेल प्रवाहांत प्रवेश मेळोवपा खातीर बरें शिक्षण आनी रोजगाराची संद दिल्यार तांच्या उदरगतीक चालना मेळूंक शकता हें निश्चीत. हे खातीर हें म्हामंडळ वावुरता आनी साबार केंद्र आनी राज्य सुविधा खूब उण्या दरांत उपलब्ध करुन दिता.
नदरे आड केल्ल्या घटकांच्या उदरगती खातीर सरकारान जायत्यो येवजण्यो आंखल्यात अशें आमदार प्रेमेंद्र शेट हांणी सांगलें. हे खातीर नरेंद्र मोदी आनी मुख्यमंत्री सेगीत वावुरतात. ह्या येवजण्यांचो फायदो घेवपाक आनी वेगवेगळ्या माध्यमांतल्यान उदरगत साध्य करपाक समाजांतल्या लोकांनी मुखार येवप गरजेचें आसा अशेंय तांणी सांगलें.
ह्या वेळार वेगवेगळ्या येवजण्यां विशीं म्हायती दिवपा खातीर एक खाशेलें शिबिर आयोजीत केल्लें. ह्या शिबिरांत अधिकाऱ्यांनी हाजीर आशिल्ल्या समाजांतल्या लोकांक म्हामंडळाच्या वेगवेगळ्या येवजण्यां विशीं म्हायती दिली. ह्या वेळार मुख्यमंत्री डॉ. प्रमोद सावंत हांणी लावार्थ्यांक वेगवेगळ्या येवजण्यांची मान्यताय पत्रां वांटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
