अनुदानीत परस सरकारी विद्यालयांक पसंती

भांगरभूंय | प्रतिनिधी

मुख्यमंत्री : फाटल्या 5 वर्सांत गोंयांतल्या पालकांचो ‘ट्रेंड’ बदल्ला
– इन्फोसीस कडल्यान विद्यालयांक स्मार्ट टॅब्लेट

भांगरभूंय । प्रतिनिधी

पणजी : फाटल्या पांच वर्सांत अनुदानीत विद्यालयां परस सरकारी विद्यालयांनी भुरग्यांक शिकपाक घालपा कडेन पालकांचो कल वाडला. हाका लागून सरकारी विद्यालयांचो दर्जो वाडपाक मजत जाता, अशें मुख्यमंत्री डॉ. प्रमोद सावंत हांणी सांगलें.

पर्वरे इन्फोसीस स्प्रींगबोर्ड लिमिटेडा वतीन विद्यालयांक स्मार्ट टॅब्लेटस दिवपाचे कार्यावळींत मुख्यमंत्री उलयताले.

कांय वर्सां आदीं भुरग्यांक अनुदानीत विद्यालयांनी घालपा कडेन पालकांचो कल आसलो. आतां हो कल बदलपाक लागला. हाका लागून आनीक कांय वर्सांनी सरकारी विद्यालयांत शिकिल्ले विद्यार्थी इन्फोसीस सारके कंपनींत काम करतात ते पळोवपाची संद मेळटली. शिक्षणा सयत आयज विद्यार्थ्यांचें डिजीटल स्किलींग करपाची गरज आसा. हाकाच लागून इन्फोसीस कंपनीन गोंयांतल्या विद्यालयां खातीर देड हजार टॅब्लेटांचें वांटप केलां. एका विद्यालयाक 30 हे प्रमाण 50 विद्यालयांक टॅब्लेटांचें वांटप जातलें. टॅब्लेटाचो वापर योग्य तरेन करपाची जापसालदारी शिक्षक तशेंच विद्यार्थ्यांची आसा. हे टॅब्लेट प्राधान्यान सरकारी विद्यालयांक मेळटले. गणीत, विज्ञान, इंग्लीश सयत हेर विशय शिकपा खातीर टॅब्लेटाचो उपेग जातलो. ह्या टॅब्लेटांत अत्याधुनीक तंत्रज्ञानाची वेवस्था आसा. इंग्लीश तशेंच हेर भाशेंतल्यान शिक्षणा संबंदीची सगळी म्हायती टॅब्लेटांत आसा. दरेका विद्यार्थ्याक सप्तकांतल्यान एक वर तरी टॅब्लेट मेळटलो, हाची जतनाय शिक्षकांनी घेवपाक जाय, अशें मुख्यमंत्री डॉ. सावंत हांणी सांगलें.

इन्फोसीस संस्थेन ऑनलायन अभ्यासक्रम सुरू केला. ह्या अभ्यासक्रमाचो लाव विद्यार्थ्यांनी घेवपाक जाय. करियर करपा खातीर परंपरीक अभ्यासक्रमा सयत हेर अभ्यासक्रम लेगीत शिकपाची गरज आसा. 2025 मेरेन देशांतल्या 10 दशलक्ष लोकांचे डिजीटल स्किलींग करपाचें इन्फोसिसाचें उद्दिश्ट आसा. विद्यालयांक टॅब्लेटाचें वांटप हो ह्याच उद्दिश्टाचो भाग आसा, अशें मुख्यमंत्री डॉ. सावंत हांणी सांगलें. कार्यावळीक शिक्षण सचीव प्रसाद लालयेंकार, शिक्षण संचालक शैलेश झिंगडे, इन्फोसीस लिमिटेडचे अधिकारी संतोश अनंतपुरा हाजीर आशिल्ले.