भांगरभूंय | प्रतिनिधी
पीओपीच्यो मुर्ती विकपाचें बंद करात : मुख्यमंत्री
अनुदान वाडोवन दिवपाक सरकार करतलें विचार
मातयेच्या वस्तूं खातीर स्थापन करतले माती कला मंडळ
भांगरभूंय । प्रतिनिधी
पणजी : गणपती करपी मुर्तीकारांक अनुदान वाडोवन दिवपाचो विचार सरकार करतलें. पूण तांणी प्लास्टर ऑफ पॅरीसचे (पीओपी) गणपतीच्यो मुर्ती विकप बंद करचें. ते भायर ह्या मुर्तीकारांक बाराय म्हयने काम मेळचें हे खातीर माती कला मंडळ स्थापन करून तांच्या उत्पादनांक पर्यटनाचे नदरेन उर्बा दितले, अशें मुख्यमंत्री डॉ़. प्रमोद सावंत हांणी सांगले.
गोंय हस्तकला, कापड आनी काथो खातें आनी गोंय हस्तकला उदरगत म्हामंडळान सेवा पखवाडा घडोवन हाडलो. ह्या वेळार मुखेल सोयरे म्हूण मुख्यमंत्री डॉ. प्रमोद सावंत उलयताले. हस्तकला, कापड आनी काथो खात्याचे संचालक सगूण वेळीप, गोंय हस्तकला उदरगत म्हामंडळाचे वेवस्थापकी संचालक दामोदर मोरजकार हजर आसले.
ह्या वेळार मुख्यमंत्र्यांचे हस्तुकीं गणपती मुर्तीकारांक येवजणेचे चेक दिवन भोवमान केलो, कापड तयार करपी बायलांक हातमाग भेटयले आनी प्रधानमंत्री विश्वकर्मा येवजणेच्या लाभार्थ्यांक रिणाचे चेक आनी टुलकीट भेटयले.
आयज दुसरी चवथ आसा आनी ह्या निमतान गणपतीच्यो मुर्ती करपी कलाकारांक अनुदानाचे चेक भेटयतात, अशें मुख्यमंत्र्यान सांगलें.
तुमी सगले मेळून कलात्मक दिसपी खूब बरें काम करपाक शकतात देखून सरकारान दर मुर्ती फाटल्यान दितात तें अनुदान 100 रुपयां वयल्यान 200 रुपया मेरेन वाडयलां. पूण अजून मेरेन सगले गणपती हे मातेचे तयार जायनात. चडशे पीओपीचे गणपती दिसतात. हाचे फाटल्यान खूबश्यो अडचणी आनी समस्या येतात तें आपूण मान्य करता, अशें मुख्यमंत्र्यान म्हणलें.
भायल्या राज्यांतल्यान मुर्ती हाडून त्यो मातयेच्यो म्हूण विकून हो फटोवपाचो धंदो बंद जावपाक जाय. गोंयकारांनी फक्त मातयेच्योच गणपतीच्यो मुर्ती विकत्यो घेवच्यो. पीओपीची गणपतीची मुर्ती घेवन आमी देवाचो अपमान करतातूच, तेच वांगडा आमी पर्यावरणाचें लेगीत लुकसाण करतात. जर पीओपीच्यो मुर्ती करप पुरायेन बंद करतले जाल्यार अनुदान वाडोवपाचेर सरकार विचार करतलें, अशें आस्वासन मुख्यमंत्री डॉ. सांवत हांणी दिलें. माती कला मंडळाची स्थापना करून मातीकलेक अतिरिक्त तेंको दिवपाचो आमी विचार करतात. फक्त चवथीच्या काळांत 2 म्हयनेच मुर्तीकार वेवसाय करतात. पूण उरिल्ले वर्सभर ते कितें करतले? हे खातीर आमी मातयेच्या वस्तूक बाजार दिवपाचो थारयला. गोंय हें पर्यटन थळ आशिल्ल्यान म्हामंडळान ह्या वस्तूंक पर्यटनाचे नदरेन उर्बा दिवची, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
