भांगरभूंय | प्रतिनिधी
उत्तर गोंय जिल्होधिकाऱ्यांचो सायबर कॅफे धनयांक आदेश
भांगरभूंय । डीआयपी
पणजीः उत्तर गोंय जिल्होधिकाऱ्यान सुरक्षेच्या कारणा खातीर एका आदेशा वरवीं उत्तर गोंय वाठारांतल्या सगळ्या सायबर कॅफे धनयांक तांचे कडेन येवपी गिरायकांची वळख पटोवन तांची म्हायती रजिस्टरांत नोंद करपाचो आदेश दिला. गिरायकाचें नांव, नामो, फोन नंबर आनी वळखपत्राची म्हायती रजिस्टरांत नोंद करून गिरायकाची सय घेवची. अनवळखी मनशांक वळख सिध्द केले बगर सायबर कॅफे सुविधांचो वापर करपाक दिवचो न्हय, अशें आदेशांत म्हणलां.
गिरायकांची वळख पटोवपा खातीर गिरायका कडेन मतदार कार्ड, वाहन चलोवपाचो परवानो, स्मार्ट कार्ड, आधार कार्ड, पासपोर्ट ह्या सारख्या वळखपत्राची मागणी करची. अशी म्हायती स म्हयने तरी सांबाळून दवरपाक जाय. गिरायका विशीं कसलोय दुबाव आयल्यार लागींच्या पुलीस स्टेशनार वा पुलीस नियंत्रण कक्षाक कळोवचें. त्याचप्रमाण सायबर कॅफे धनयांनी सायबर कॅफेच्या प्रवेश दाराचेर सीसीटीव्ही कॅमेरे बसोवचे, अशें आदेशांत म्हणलां.
हो आदेश 8 सप्टेंबर सावन तत्काळ लागू जाला आनी मदीं फाटीं घेतलो ना जाल्यार 60 दिसां मेरेन म्हणल्यार 6 नोव्हेंबर मेरेन लागू उरतलो. ह्या आदेशाक पाळो दिनात तांचेर भारतीय दंड संहितेच्या कलम 188 खाला कारवाय जातली, अशें आदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
