अनमोल रत्न

भांगरभूंय | प्रतिनिधी

(लेख कोंकणीचे मंगळुरी शैलींत आसा.)
उद्देगीक जगांतलें अनमोल रत्न रतन टाटाक विधात्यान आपोन व्हेलें. करोडों लोकांले मनांतु प्रेम आनि सन्मान मेळैल रतन टाटान उद्देगीक क्षेत्रांतु भरपूर योगदान दिलां. समाजसेवा आनी राष्ट्रभक्तीचें जिवें उदाहरण जाव्नासिलो तो. कोरोना महामारीच्या कालांतु पीडित लोकांले उपचाराक, ताणें १५०० कोटी रुपये दान केले. हें कोणे विसोर्चे न्हय्. तागेल शांत आनी नम्र व्यक्तीमत्वान “मरावे परि कीर्ती रूपाने उरावे” म्हळिल आद्गती सिद्ध कोर्नु दाकैल्यां.
एकपंता रेडियो कार्यक्रमात मुलखत घेत्तल्यान रतन टाटाक विचारलें, “सर…तुमकां जीवनांतु सर्वोत्कृष्ट आनंद केन्न मेळिलो?” रतन टाटा सांगले, “जीवनांतु आनंदाचे चार स्तर पळैल नंतर माका खरे…ऽऽ आनंदाच अनुभूती जाली.” पयला स्तर – संपत्ती जमा कोर्च हव्यास. दुसरो स्तर – मौल्यवान वस्तू संग्रह कोर्च हव्यास. तिसरो स्तर – जेन्ना हांव आशिया खंडांतुल सर्वांत होड स्टील कारखानेच मालक जालों तेन्न बी अत्रप्त आसिलों. चवथो स्तर आयिल तेन्ना एक घटना घडली.
मेगेल एक खास दोस्तान माका अपंग चेर्डूंवां खातिर २०० व्हीलचेअर विकत घेवचाक सांगलें आनी आग्रह केलें की…तुंवेंची तुगेल हात्तान ते व्हीलचेअर अपंग चर्डूंवांक दिवका. दोस्ताली इच्छा हांवे पूर्ण केली. मेगेल हात्तांन प्रत्येक चेर्डूंवांक व्हीलचेअर दिलें. त्या सभांगणांतु व्हीलचेअरारी बसून ती चर्डूंव खेळ्तसिलीं. तांगेल चेहरे वैलो आनंद पोळोन खरोखर आनंद म्हळ्यारी कसने म्हळिलें त्या दिस माका कळ्ळें.
कार्यक्रमानंतर परतताना त्या दिव्यांगापैकी एकळ्यान मेगेल पाय घट्टि धरले. कित्त-कित्तकेलेतिकी तो पाय सोडच्या तयारना.
हांवे वाकून ताका विचारलें, “तुका मेगेल कडच्यान आनि कसने जावकावे?” तो चेल्लो म्हळालो, “लागिच्यान तुका पोळोन तुगेलो चेहरो माका लक्षांतु दवोर्नुघेव्चासा. कारण मेगेल मरणानंतर स्वर्गारी तुगेल भेटी जाल्यारी, तुगेल गुर्तु धोर्नु पुन: तुगेल उपकार उगडास कोर्नु धन्यवाद कोर्चासा.”
रतन टाटा मुलाकात घेत्तल्याक सांगता, “हें आय्कून हांवे अंतरात्मा ओट्टु दीर्घ संवाद साधलो. तेन्ना मेगेल विवेक बुद्धीक स्पष्ट कोळ्नु आयलें की… हें जीवन, संसार, ऐहिक कार्यांतुल्यान मुक्त जालेनंतर याने मरणानंतर आमगेल उगडास कोणे कर्तलवे? एकादवेळ केल्यारी ताजेकिंता होड आनंद, समाधान दुसरा आनि खंचेना.”
रतन टाटाल जिद्द, दूरदृष्टी युवकांक प्रेरणा जाव्नासा. असले एक महान आदर्श व्यक्तीक, चेतना शक्तीक भावपूर्ण श्रद्धांजली वाहताना देवाल्यागी हांव मागतां, “तागेल आत्म्याक सद्गती मेळो”

पद्मनाभ नायक
9969267656