भांगरभूंय | प्रतिनिधी
बेळगांव, खबरां संस्था: अनमोड घाट मार्ग सगले तरेच्या वाहनां खातीर एक मार्ग पद्धतीन उक्तो करचो, अशी मागणी गाडेकारांनी केल्या. हे विशीं ऑल गोवा लॉरी असोसिएशन तशेंच बेळगांव आनी उत्तर कन्नड जिल्ह्यांतली लॉरी मालक संघटणेन सध्या गाडयांक १०० ते १५० किमीचो चड फेरो मारचो पडिल्ल्यान खर्च बरोच वाडला, अशें म्हणलें.
फाटल्या ४ जुलयाक अनमोड घांटांतल्या गोंयच्या हद्दींतल्या रस्त्याचो एक भाग कोसळ्ळा. डांबराच्या रस्त्यार वेरो पडिल्ल्यान हो अपघात जाला. उपरांत ५ जुलयाक उत्तर गोंय जिल्लोधिकार्यांनी आदेश काडून घांट मार्ग फकत गरजेची सेवा आनी बसी पुरतो मर्यादीत केलो, जाल्यार हेर गाडयांक बंदी घाली.
हाका लागून सध्या गोंय-कर्नाटच्या वाहनांक कारवार वा चोर्ला घांट मार्गान प्रवास करचो पडटा. स सप्तकां परस चड काळ हुपिल्ल्यान गोंय आनी कर्नांटकांतल्या येरादरीचेर बरोच व्हड परिणाम जाता. १०० ते १५० किमीच्या रेवाड्याक लागून माल येरादारी खर्च बरोच वाडिल्ल्यान ताचो परिणाम सरळ वस्तूंच्या किमतींचेर जाता.
शिमेंचेर खुबशीं जड वाहनां धनयांनी दवरल्यांत. वाडिल्लो खर्च परवड नाशिल्ल्यान खुबश्या जाणांचे बँकेच्या रिणांचे हप्तेय थकल्यात.
मजगतीं, घांटांचेर कोसळिल्ल्या सुवातांचेर तात्पुरतें दुरुस्तीचें काम केल्ल्यान लोखणाचें रॉड लावून रस्तो घटमूट करपाचो यत्न केला. मात पुराय दुरुस्तीक आनीक वेळ लागतलो. हाका लागून, सगले तरेच्या वाहनांक एकमार्गी पद्धतीन घांट मार्गान सोडचें आनी ताका लागून होमगार्ड नेमचो आनी पाळत दवरची, अशी मागणी वाहन धनयांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
