भांगरभूंय | प्रतिनिधी
कोणाकय नवो संवसार करपाचो आसता तेन्ना फकत ताचे कडेन एक घर आसलें म्हणून संवसार जावंक शकना. तो फुडें व्हरपाक, वाडोवपाक गरजेच्या कितलेशोच गजाली लागतात. देखीक फर्नीचर, आयदना, हांतरूणा, गॅस, शेगडी अशो कितलेशोच गजाली जाय पडटात. बदलत्या काळा प्रमाण नव्या काळाच्योय म्हणून वेगळ्यो गरजो आसतात. काळ बदलता तशो नव्यो गरजो तयार जातात. त्योय ल्हव- ल्हव पूर्ण करच्यो पडटात. खंयचेय विकसीत जावपी भाशेचे बाबतींतय अशेंच आसता. कोंकणीचो विचार करपाचो जाल्यार कोंकणी ही विकासाचे वाटॆर आशिल्ली भास. तिचे परिस्थितीचो विचार केलो जाल्यार तिणें खूबशीं जैतां थोड्याच काळांत जोडल्यांत. ताचें श्रय शणै गोंयबाब धरून सगल्याच म्हालगड्यांक वता. कोंकणी भाशेच्या प्रसारा खातीर वावुरपी दर पिळगेन आपले- आपले तांकी प्रमाण भास वयर काडपाक योगदान दिलां. नवी पिळगीय तें काम फुडें व्हरतना दिसता. तांची पद्दत घडये म्हालगड्यांक मानवना आसत. काम करता हें म्हत्वाचें.
एका काळार आमचे हे भाशेक ‘भास’ म्हणूनय मानपाक कांय ‘काळखाचे पुजारी’ तयार नाशिल्ले, ती भास आतां पद्व्युत्तर अभ्यासक्रमात पावली. गुगला मेरेन तिचो प्रवास जालो. साहित्य निर्मणेचें कामूय चालूच आसा. साहित्य अकादेमीचे मान्यताये उपरांत संविधानाच्या आठव्या परिशिश्टांत तिचो आसपाव जातकच कोंकणीच्या विकासाचीं कितलीशींच दारां उक्ती जावन रावल्यांत. त्या दारांतल्यान आमकां प्रवेश करपाक जाय. खंयची- खंयचीं दारां कोंकणीच्या अभ्यासकां खातीर उक्ती जाल्यांत ताची सगळ्यांकूच म्हायती आसा, अशेंय ना. ती म्हायती आमी करून घेवपाक जाय.
कोंकणी विद्यापीठ पांवड्यार पाविल्ल्यान नवे- नवे अध्यापक, प्राध्यापक तयार जाल्यात. तांच्यो बडट्यो वा हेर जायत्या गजालीं खातीर नव्यो गरजो निर्माण जाल्यात. तांच्या बर्या फुडारा खातीर युजीसीची मान्यता आशिल्ल्या कोंकणीतल्या मॅगझीनाची आतां सामकीच गरज निर्माण जाल्या. ते खातीर मान्यता प्राप्त नेमाळीं प्रसिद्ध जावपाची गरज आसा. गोंयांत जाग, बिंब हीं नेमाळीं नेमान येतात. पूण, तांचो आस्पाव युजीसी केअर वळेरेंत नाशिल्ल्यान विद्यापीठात कोंकणी शिकोवप्यांक ताचो फायदो ना. ह्या शिक्षकांचें संशोधनाचेर आदारीत लेखन मान्यता आशिल्ल्या मॅगझिनांनी छापून येवपाची गरज आसता. युजीसीच्या नव्या नेमा प्रमाण तांची मान्यता आशिल्ल्या मॅगझिनानीच तांचें बरप उजवाडाक येवंक जाय. तें आयलें जाल्यारूच विद्यापीठ तांची दखल घॆता.
2019 सावन शिक्षक वर्गाक असलें व्यासपीठूच नाशिल्लें. सुदैवान गोवा कोंकणी अकादेमी आनी अकादेमीची आदली लोकवेद संशोधक डाॅ. जयंती नायक हांच्या यत्नांतल्यान अकादेमीच्या ‘अनन्य’ ह्या 6 म्हयन्यांनी प्रकाशीत जावपी साहित्यीक मॅगझिनाचो युजीसी केअर वळेरेंत आस्पाव जालो. कोंकणीचे बाबतींत ही प्रतिश्ठेची आनी अभिमानाची गजाल. हाका लागून विद्यापीठ पावंड्यार विद्यादान करप्यांक आपले संशोधन पेपर प्रकाशीत करपाक आदार जाला. फाटलीं 16 वर्सां ही पत्रिका नेमान प्रकाशीत जाता. साहित्य अकादेमी जे तरेन मॅगझीन काडटा, तेच पद्धतीचें हें कोंकणीतलें मॅगझीन. अकादेमीचे वतीन अशे तरेची पत्रिका काडपाची 16 वर्सा आदीं ज्या मंडळान कल्पना मांडली ताची तोखणाय करचीच पडटली.
आमच्या जयंतीन ‘अनन्या’ क भुरग्यां भशेन व्हडलें केलें. दर्जो, प्रतिश्ठा मेळोवन दिलो. मराठी साहित्यकारांच्या कोनाळ्यांतूय ‘अनन्या’ चें सदांच स्वागत जालां. ‘अनन्य’ ही आतां कोंकणीच्या संवसाराची गरज जाल्या. विद्यापीठ पांवड्या वेल्या शिक्षकांनी ताचो फाव तसो उपेग करून घेवक जाय. खरें म्हळ्यार ताच्या दर्जा सयत तें तिगून उरचें म्हणून ‘अनन्या’ चे भोंवतणी इरलें जावन रावपाक जाय. युजीसी केअर वळेरेंत ताचो आस्पाव जाले उपरांत खरें म्हळ्यार विद्यापीठांतल्या कोंकणीच्या शिक्षकांनी ताचें स्वागत करपाक जाय आशिल्लें. कारण ह्या ‘अनन्या’ चो अॅकाडेमीक नदरेन विद्यापीठ पावंड्यारूच चड फायदो आसा.
साहित्य अकादेमीचे कोंकणीचे निमंत्रक डॅा. भूषण भावे हांणीच सगळ्यांत पयली अभिमानान ‘अनन्य’ युजीसीचे केअर वळेरेंत आस्पावीत जाल्ल्याचें जाहीर केलें, तेन्ना ह्या मॅगझिनाचें म्हत्व सर्वसामान्यांकूय कळ्ळें. अशें आसतनाय कांय अती बुधवंतांक ‘अनन्य’ अकादेमीन प्रकाशीत करचो न्हय, अशें कित्याक दिसता तें कळना. हो संशोधनाचो विशय जावं येता. कांय जाणाक असल्यो पत्रिका खाजगी प्रकाशनांनी काडच्यो कशो दिसता. म्हजे नदरेन त्योय येवच्यो. तांणी ताकाय दर्जो हाडून युजीसीची मान्यताय मेळोवपा खातीर यत्न करचे. अशी मॅगझिना आयलीं जाल्यार ताचो फायदो शिक्षक वर्गाक जातलोच.
कांय वर्सा फाटीं हांव कम्युनिस्ट विचारधारेच्या लोकांच्या सहवासांत आयलो. तेन्ना तांची एक घॊषणा आशिल्ली ‘पोरणीं देवळां मोडात आनी नवीं देवळां उबारात’. वाचकांनी देवळांचो शब्दशा अर्थ घेवचो न्हय. हांव तेन्ना भुरगो. पूण, म्हाका नवीं बांदचे पयलीं पोरणीं देवळां मोडपाची घोशणा मानवलीना. हांवें म्हळें पोरणीं देवळां मोडले उपरांत नवीं देवळां बांदूक जमलीना जाल्यार बाप्पाय ना आनी पुडवेंय ना जावचेंना मू? पयलीं सुंदरशीं नवीं देवळां बांदात, लोक सगळे नव्याच देवळांनी वतले. लोक त्या देवळांनी वचूक लागले म्हणटकच पोरणीं देवळां मोड म्हणपाची गरजूच पडचीना. उपरांतच्या काळांत सगल्याच न्हंयांतल्यान तरातरांचें उदक व्हांवून गेलें आनी ‘पोरणीं देवळां मोडूया’ म्हणपीच पोरण्यां देवळांतल्या देवांचे भक्त जावन रावले. आमी वास्तव स्विकारलें म्हणून सालवार.
गोवा कोंकणी अकादेमीन फेस्तां करीनासतना कोंकणीचीं अॅकाडेमीक स्वरूपाचींच कामां करचीं, अशें खूब जाणाचें मत. तें खरेंय बी. ‘अनन्य’ हो अकादेमीचो अॅकाडेमीक उपक्रम. सरस्वतीचेच देवूळ तें, 16 वर्सां पोरणें. तें सांबाळून दवरूंक जाय. बंद करूक फावना. सद्या येतात त्या खाजगी मॅगझीनांक तशे तरेचो दर्जो मेळचो म्हुण तांणी यत्न करचो. आसा तें बंद उडोवपाचो विचार लेगीत येवचो न्हय.-
संजीव वेरेंकार
9422643629
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
