भांगरभूंय | प्रतिनिधी
भाजपा कोअर समितीची मुख्यमंत्र्यां कडेन मागणी
पणजी ः राज्यांतल्या वेगवेगळ्या वाठारांतली अनधिकृत घरां आनी बांदकामांनी गांयकारांच्या बांदकामांचोय आस्पाव आसा. देखून सरकारान अनधिकृत बांदकाम मोडपाचो विचारपूर्वक निर्णय घेवचो अशी मागणी मंगळारा भाजपाच्या कोअर समितीच्या वांगड्यांनी मुख्यमंत्री डॉ. प्रमोद सावंत हांचे कडेन केली. भाजपा-मगो युतीच्या विशयाचेर बसकेंत कसलीच चर्चा जावंक ना अशें सूत्रांनी सांगलें.
उच्च न्यायालयाच्या आदेशा प्रमाण, सरकारी, कोमुनिदाद आनी रस्त्या लागसारची अनधिकृत बांदकामां मातये भरवण करपाचो निर्णय सरकारान घेतला. हे खातीर संबंदीतांक मुख्यमंत्र्यांनी १५ दिसांचो वेळ दिलां. पूण अशा बांदकामांत स्थलांतरितां सयत गोंयकारांचीय घरां आनी हेर बांदकामां आसा. तांचीं बांदकामां मोडल्यार येवपी वेंचणुकेंत पक्षाक लुकसाण जावंक शकता. ते खातीर सरकारान अशा बांदकामां विशीं विचारपूर्वक निर्णय घेवचो अशी मागणी कोअर समितीच्या वांगड्यांनी मुख्यमंत्र्यां कडेन केली.
मजगतीं, भाजपा वांगडा सत्तेर आशिल्ल्या मगो पक्षा संबंदीं मुख्यमंत्री डॉ. सावंत आनी मंत्री गोविंद गावडे हांणी फाटल्या कांय दिसांनी केल्ल्या विधानांक लागून ह्या दोनूय पक्षां मदलो युती येवपी वेंचणुकेंत तिगून उरतलो काय ना हाचेर दोनूय पक्षांच्या कार्यकर्त्यां मदीं प्रस्न उप्रासल्यात. देखून कोअर समितीचे बसकेंत हो विशय येतलो अशी अपेक्षा आशिल्ली. पूण ह्या विशयाचेर बसकेंत कसलीच चर्चा जावंक ना अशें सूत्रांनी सांगलें. पक्षाच्यो येवपी कार्यावळी आनी वेंचणुकेची तयारी हांचे विशीं चड वेळ चर्चा जाल्ल्याचोय उल्लेख सूत्रांनी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
