भांगरभूंय | प्रतिनिधी
सरकारान जारी केली एसओपी
पणजी ः गोंय अनधिकृत बांदकाम नियमन कायद्या खाला मार्च 2025 मेरेन प्रलंबीत आशिल्ले अर्ज निकालांत काडपाचे निर्देश सरकारान उपजिल्होधिकाऱ्यान आनी संबंदीत यंत्रणेक दिल्यात. मुंडकारांच्या घरांच्या अर्जांचेर विचार करून म्हयन्याक थारावीक अर्ज निकालात काडपाचे उद्दिश्ट दवरचें. हाचे प्रमाण दरेका अर्जाचेर सुनावणी घेवन अर्जाचो विचार करचो अशें जारी केल्ल्या एसओपींत स्पश्टपणान सांगलां.
आतां मेरेन आयिल्ल्या 10 हजारांतले 3 हजार अर्ज उपजिल्होधिकाऱ्यांनी न्हयकारल्यात. उरिल्ले अर्ज निकालात काडपाची प्रक्रिया सुरु आसा. ह्या कायद्या खाला अनधिकृत बांदकामांचें नियमितीकरण करपाची प्रक्रिया मार्च 2025 मेरेन पुराय करपाचें उतर मुख्यमंत्री डॉ. प्रमोद सावंत हांणी अर्थसंकल्पांत दिल्लें. हें उतर पाळपा खातीर महसूल खात्यान एसओपी जारी केला.
एसओपींतले मुखेल मुद्दे….
१. उपजिल्होधिकारी/संबंदीत यंत्रणांनी प्रलंबीत आशिल्ल्या अर्जांची बारीकसाणेन तपासणी करुन म्हयन्याक कितले अर्ज निकालात काडप शक्य आसा हाचो आंकडो थारावचो.
२. म्हयन्याक निकालाक काडिल्ले अर्ज आनी प्रलंबीत अर्जाचो अहवाल उपजिल्होधिकाऱ्यांनी अतिरिक्त जिल्लोधिकाऱ्यांक सादर करचो.
३. अतिरिक्त जिल्होधिकारी – १ पंदरा दिसां उपरांत नियाळ घेवन सरकाराक अहवाल सादर करतले.
४. अर्जदाराची बाजू आयकून घेनासतना उपजिल्होधिकारी/संबंदीत यंत्रणा अर्ज न्हयकारूंक शकना.
५. अनधिकृत बांदकाम नियमन कायदो वा जमनीचो वाद आसल्यारूच अर्ज न्हयकारूं येता.
६. अर्जांचेर योग्य निर्णय घेवपा खातीर उपजिल्होधिकारी/संबंदीत यंत्रणेक कायदो दुरुस्ती, परिपत्रकां विशीं पुराय म्हायती आसपाक जाय.
७. भौशीक बांदकाम खातें, रान खातें, शार नियोजन हांकां अर्जां संबंदी वेळार अहवाल दिवपाक सांगचें.
८. वेळार तपासणी करुन खात्यांक अहवाल सादर करपाक सांगप ही उपजिल्होधिकारी/ संबंदीत यंत्रणेची जापसालदारकी आसा.
९. मुंडकार घरांक गोंय मुंडकार संरक्षण कायदो 1975 चो लाव दिवचो.
१०. दर म्हयन्याक अतिरिक्त जिल्होधिकारी – १ हांणी निकालात काडिल्ल्या अर्जांचो अहवाल महसूल सचीवा कडेन सादर करचो.
११. म्हयन्यांत कितले अर्ज निकालात काडप शक्य आसा त्या अर्जांचो आंकडो निश्चित करुन सुनावणी घेवपाची जापसालदारकी उपजिल्होधिकारी/संबंदीत यंत्रणेची आसा.
१२. अर्जांतल्यान येवपी महसूलाचो आंकडो पंचायत/खात्या प्रमाण उपजिल्होधिकाऱ्यांक/संबंदीत यंत्रणेक 15 दिसांनी सादर करचो पडटलो. महसूलाचो आंकडो जिल्होधिकारी महसूल खात्याक सादर करतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
