भांगरभूंय | प्रतिनिधी
पणजी : राज्यांतल्या अनधिकृत तशेंच अतिक्रमण करून बांदिल्ल्या बांदकामां विशीं न्यायालयान दिल्लो निर्णय आनी पंचायत संचालकांनी जारी केल्लें परिपत्रक पळोवनूच फुडलो निर्णय घेतले, अशी हमी मुख्यमंत्री डाॅ. प्रमोद सावंत हांणी दिली.
न्यायालयाच्या आदेशा प्रमाण, तलाठ्यांनी गांवठण सयत सरकारी, कोमुनिदाद सुवातेर अतिक्रमण करून उबारिल्ल्या बांदकामांचो सर्व्हे करचो, अशें परिपत्रक पंचायत संचालक सिद्धी हळर्णकर हांणी जारी केल्ल्यान सगल्याच म्हालांतल्या नागरिकां मदीं भंयाचें वातावरण पातळ्ळां. ह्या निर्णयाक लागून पालिका, पंचायतीं मुखार पेंच निर्माण जालो. हे विशींची ‘ब्रेकिंग’ मंगळारा ‘भांगरभूंय’न दिल्ली. मंगळारा सकाळीं विधानसभेचें कामकाज सुरू जातांच विरोधी पक्ष फुडारी युरी आलेमाव हांणी हो विशय हजर करीत मुख्यमंत्र्यांक धारेर धरपाचो यत्न केलो.
पंचायत संचालकांच्या ह्या परिपत्रकाक लागून नागरिकां मदीं व्हडा प्रमाणांत भंयाचें वातावरण पातळ्ळां. सरकारी वा कोमुनिदादचे जमनीर जायत्या गोंयकारांनीय घरां बांदल्यांत. तांच्या घरांचो सरकारान विचार करप गरजेचें आशिल्ल्याचेंय आलेमाव हांणी नमूद केलें.
आलेमाव हांकां जाप दितना राज्यांत अनधिकृत तशेंच अतिक्रमण करून बांदिल्ल्या घरां विशीं उच्च न्यायालयान जो निर्णय दिला, ताचो अभ्यास करून आनी हे विशीं पंचायत संचालकांनी जारी केल्लें परिपत्रक पळोवनूच योग्य तो निर्णय घेतले, अशें मुख्यमंत्री डॉ. प्रमोद सावंत हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
