भांगरभूंय | प्रतिनिधी
पणजी ः राज्यांतली अनधिकृत बांदकामांक कायदेशीर करपा खातीर नवो अध्यादेश चालीक लावपाचो विचार सुरु आसा. उच्च न्यायालयाच्या आदेशा प्रमाण बेकायदेशीर बांदकामां आड कारवाय जातली. ताका लागून रस्त्यांचेर, म्हामार्गांचेर बेकायदेशीर रितीन बांदिल्लीं बांदकामां लोकांनी स्वताच काडून उडोवचीं अशें आवाहन मुख्यमंत्री डॉ. प्रमोद सावंत हांणी केले.
बेकायदेशीर बांदकामा संबंदी उच्च न्यायालयान दिल्ले आदेशा उपरांत मंगळारा मुख्यमंत्री डॉ. सावंत हांणी मंत्री, आमदार तशेंच संबंदीत खात्याच्या अधिकाऱ्यां वांगडा उच्च पांवड्यावेली बसका घेतली. अनधिकृत बांदकामांचें नियमितीकरण करपा सयत बेकायदेशीर बांदकामां विशीं हे बसकेंत चर्चा जाली.
बसके उपरांत पत्रकारां कडेन उलयतना मुख्यमंत्र्यांनी सांगलें, राज्यांत अनधिकृत बांदकामां नियमित करपा खातीर सरकार यत्न करता. हे खातीर आतां सरकार नवो अध्यादेश जारी करपाचो विचार करता. पूण न्यायालयाच्या आदेशा प्रमाण बेकायदेशीर रितीन बांदिल्लीं बांदकामां मोडून उडोवपाचो निर्णय सरकारान घेतला. देखून सरकारान कारवाय करचे पयलीं संबंदीतांनी रस्त्यांचेर वा म्हामार्गांचेर बेकायदेशीर रितीन बांदिल्लीं बांदकामां काडून उडोवचीं असो सल्लो तांणी दिलो.
लोकांक बेघर करचें नात!
म्हामार्ग रुंद करपाक आडमेळीं हाडपी बेकायदेशीर बांदकामां मोडपाचे निर्देश उच्च न्यायालयान दिल्यात. देखून हेर वाठारांतली अशीं बांदकमां मोडून आंमकां लोकांक रस्त्यार हाडपाचें ना. आयचे बसकेंत हे विशीं सविस्तर चर्चा जाली अशें येणावळ मंत्री बाबूश मोन्सेरात आनी पंचायत मंत्री मॉविन गुदिन्हो हांणी सांगलें.
स्थलांतरीतांच्या घरां संबंदी विचार करुन निर्णय घेवपाची गरज
सांताक्रूझांतल्या इंदिरा नगर सारक्या वाठारांनी स्थलांतरीत लोक जायतीं वर्सां सावन रावतात. राज्यांतल्या हेर वाठारांनीय जायत्या जाणांनी बेकायदेशीर रितीन घरां बांदल्यांत. पूण, हे लोक गोंयचे न्हय. ते खातीर सरकारान तांच्या घरां संबंदी विचारपूर्वक निर्णय घेवपाची गरज आसा अशें आमदार रुडॉल्फ फर्नांडिस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
